Publicado en Oficios tradicionales

Cuchillero, un oficiu tradicional

Miguel Vega, con 19 años, ye ún de los cuchilleros más nuevos d’Asturies: «Yá llevo más de 1.000 pieces feches» La Voz

Esti asturianu caltién vivu un oficiu qu’aprendió del so padre. Agora ye él quien da forma coles sos propies manes a cuchiellos, navayes y otros preseos cortantes

Hubo un tiempu nel que bona parte de los oxetos cotidianos nacíen del inxeniu, la maña y les manes d’un artesanu. Col pasu de los años, la mecanización y les meyores tecnolóxiques fueron sustituyendo munchos d’estos oficios tradicionales, qu’adulces cayeron nel olvidu. Dalgunos, sicasí, aguantaren a sumir, como’l del cuchillero. Un oficiu que, a diferencia d’otres, inda cunta con relevu xeneracional gracies a mozos como Miguel Vega, que decidió caltener un saber facer que forma parte del patrimoniu cultural mundial.

La cuchillería, en realidá, forma parte de la vida d’esti asturianu de 19 años desque nació. El so padre rexenta’l taller Navayes FV, en Taramundi, polo que se crió y creció ente’l calor del fueu de la fragua, el ruiu del golpe del martiellu sobre la incla y el movimientu constante de les ferramientes coles que se moldia, afila y da forma a cada cuchiellu. «Yá de bien pequeño andaba pequí, porque yera un trabayu qu’amás me llamaba enforma l’atención», asegura’l mozu, que col pasu de los años atopó nesti oficiu artesanal la so verdadera vocación.

Como nun podía ser d’otra manera, al igual qu’heredó del so padre la pasión por esti trabayu, foi él quien#-y enseñó la técnica y toles conocencies necesaries pa ellaborar un cuchiellu, una navaya o cualquier otra ferramienta de tayu de principiu a fin. «Hasta que nun cumplí los 12 años nun empecé a facer les mios propies pieces. La primera qu’ellaboré foi un cuchiellu de caza. Tien les sos imperfecciones, sí, pero, nesi momentu tampoco tenía muncha esperiencia», confiesa Miguel, que guarda como oru en pañu aquella creación puesto qu’el so valor sentimental tesciende la so utilidá y desperfectos. «Inda la caltengo», asegura.

A partir d’esi momentu, el mozu taramundés empezó a echar un gabitu a quien se convirtió na so gran maestru nel taller. Mientres contribuyía a solliviar la so carga de trabayu, aprovechaba cada xornada nel taller pa perfeccionar la so técnica. «Fui adulces tratando de facer dalguna pieza especial p’asina poder presentame a concursos y demostrar lo que sé de facer», esplica. Pa sorpresa de munchos, consiguió’l premiu «Nuevu Cuchillero» hasta en trés ocasión. Algamó de manera consecutiva l’oru n’imponiéndose a otros cuchilleros llegaos de distintos puntos d’España nel certame que se celebra añalmente n’Albacete.

Amplió, apocayá, el so palmarés con una nueva reconocencia na XLV edición del Concursu de Cuchillería de Castiella-La Mancha, dientro de la categoría que fomenta’l relevu xeneracional d’esti oficiu. «Gané’l primer premiu con un cuchiellu de caza. La fueya ye d’aceru VG-10, un aceru xaponés de gran calidá. Pa les nalgues, esto ye, el mangu, utilicé cuernu de búfalu y los remaches son pines texturizados », detalla sobre esta pieza que-y llevó muncho « trabayu» facela. «Fueron 20 hores, tranquilamente, pero bonu toi bien contentu de cómo quedu y, por supuestu del resultáu», almite.

Pa crear una pieza de cuchillería, independientemente del so tamañu, ríquese maña, talentu y una fonda conocencia del oficiu. La paciencia tamién ye fundamental, pos el procesu pue enllargase mientres hores y esixe curiar hasta’l más mínimu detalle. «Lo bono de tou esto ye que nun ye un trabayu monótonu. Cada pocu camudes de xera y, amás, nun tas too’l ratu nel mesmu sitiu del taller», afirma. Sicasí, reconoz que tamién hai procesos qu’obliguen a pasar tiempu «faciendo lo mesmo». «Esa sería, por señalar daqué, la parte mala d’esti oficiu. Pero, como en toes, nun hai nenguna perfecta», conclúi’l mozu.

Como lo que siente ye pasión pola cuchillería, Miguel solo suaña con poder dedicase a esti oficiu que-y enseñó’l so padre. «La mio idea ye coyer el taller familiar pa siguir calteniendo con vida esta tradición tan grande que tenemos equí en Taramundi», confiesa a los sos 19 años. Deseya amás qu’otros mozos fagan lo mesmo qu’él, porque, «lamentablemente», cada vez son menos les persones que quieren facer d’esti trabayu’l so oficiu. Dica agora, el so mayor retu ta en siguir aprendiendo, perfeccionar la so técnica y demostrar que l’artesanía tamién tien un llugar nel futuru.

Autor:

Maestra de Llingua Asturiana Colexu Carmen Ruiz-Tilve - Uviéu