Publicado en Asturianu

Especialidá docente d’asturianu

El Conseyu d’Estáu da vía llibre a la especialidá d’asturianu: aprobaráse nel próximu Conseyu de Ministros. El martes completaríase’l trámite de modificación de los reales decretos que va permitir iguar la situación de precariedá llaboral de los más de 300 docentes de Llingua Asturiana y Gallego-asturiano, una vieya demanda de la comunidá educativa y del Gobiernu autonómicu. Mi Oviedo /

L’últimu pasu previu yá ta dau. El Conseyu d’Estáu, na Comisión Permanente celebrada ayeri, despachó el «Proyeutu de Real Decretu pol que se modifiquen diversos Reales Decretos qu’afiten les especialidaes de los cuerpos docentes a los que se refier la llei orgánica 2/2006, del 3 de mayu, d’educación, en rellación coles llingües non oficiales que gocien de proteción llegal nes comunidaes autónomes», demanda del Gobiernu d’Asturies que-y permitirá crear la especialidá docente de Llingua Asturiana y Gallego-asturianu y que daría pie, si asina lo consideraren, a Castilla y Lleón y Aragón a facer lo propio col lleonés —glotónimu que recibe l’asturlleonés nesta comunidá— y l’aragonés. El dictame señala que «nun se formulen oxeciones al so conteníu, pudiendo considerase afayadiza la regulación propuesta dende la perspeutiva de la llegalidá y de la téunica normativa emplegada», confirmó a miGijón el Ministeriu d’Educación, Formación Profesional y Deportes.

Llueu d’esti preste, que siguió al del Conseyu Escolar del Estáu del día 3, el proyeutu tien que pasar a la Comisión General de Secretarios de Estado y Subsecretarios (CGSEYS), que suel aconceyar los llunes pa esaminar tolos asuntos que vayan a sometese a aprobación del Conseyu de Ministros de los martes. La previsión ye que tea sobre la mesa nel próximu, precisamente l’últimu de la llexislatura enantes de que pase a entrar en funciones, lo que limita la so capacidá d’actuación. Una vegada cubiertu’l trámite de Madrid, el Gobiernu d’Asturies yá podrá desenvolver el decretu d’especialidaes de Llingua Asturiana y Gallego-asturiano, nel que ta trabayando.

D’esta forma daráse portazu a una demanda qu’arranca nel 1984 col entamu de la escolarización n’asturianu en dellos centros pilotos del territoriu y que l’Exectivu autonómico lleva solicitando al ministeriu dende l’añu 2001, siempre con negatives basaes na falta d’oficialidá. Anguaño más de 300 docentes de la materia atópense nuna situación de precariedá llaboral con respeuto a los sos compañeros de centru, nun tienen la posibilidá d’opositar pola so especialidá y tán condeaos a la interinidá, situación que s’iguará con esta modificación de los reales decretos y el posterior decretu autonómicu.

Autor:

Maestra de Llingua Asturiana Colexu Carmen Ruiz-Tilve - Uviéu