Publicado en Asturies, Fiestes

Fiesta de L´Amuravela (Cuideiru)

La fiesta de L’Amuravela ye una fiesta que se celebra na localidá asturiana de Cuideiru tolos años el 29 de xunu, festividá de San Pedro, patrón del pueblu. Mientres cuatro díes celebra les festividaes de San Pedro, San Pablo y San Pablín.

Pero si realmente queréis oyer una bona amuesa del asturlleonés del baxu Nalón podéis averavos el día de San Pedro (29 de xunu) a la multitudinaria fiesta de L’Amuravela, declarada Bien d’Interés Turísticu Nacional en 1979, un sermón laicu cargáu de rima y suspicacia que resume lo socedío nel añu.

Dende fai más de 30 años l’encargáu de recitalo ye l’escritor Cesáreo Marqués, anque fueron célebres otros narradores como Xuacu Gaitanu o Xuan de la Cuca. Paez ser que debíu al resquemor de les palabres d’esti postreru’l párrocu decidió prohibir la fiesta escontra 1900, nun recuperándose hasta 1946.

Dichos versos empiecen asina:
Nel nomi de Xuasús
ya la Virxi Soberana,
vou ichar l’Amuravela
comu San Pedru asperaba.

A lo que, en recitando’l sermón, conclúi con un saludu al santu nel códigu náuticu:

Mientras Cuideiru viva
ya duri la Fonti’l Cantu,
vei San Pedru a la Ribera
con toudus lus demás Santus.

¡Amura vela!
¡Isa vela!
¡Fuau a babor!
¡Fuau a estribor!

¡Viva Pedru!

¿Y de ónde vien esta tradición? Nun se sabe a ciencia cierta, pero dizse que l’orixe del sermón ta venceyáu al regresu de los marineros que participaron na conquista de La Florida enrolados na nave «L’Espíritu Santu», fai más de 400 años.

Autor:

Maestra de Llingua Asturiana Colexu Carmen Ruiz-Tilve - Uviéu