Publicado en TIEMPU

Estáu del Tiempu n´Asturies

 

MARTES 25 D’AGOSTU DEL 2020, ESTÁU DEL TIEMPU Y PREDICIÓN.

Bonos díes, bona xente.

Alborecemos col cielu escampláu y con unes temperatures que tan alrodiu de los 17ºC.

Güei tendremos un día poco nuboso y soleyeru , aumentando la nubosidá al atapecer na fastera norte d’Asturies cola posibilidá de dalgo d’orpín al finar el día nes zones más favoretibles, quedando escampláu nes zones altes de la cordelera y dellos valles del surocidente. Les temperatures n’ascensu y l’aire variable y sele en xeneral con dalgo de nordés pela costa.

Mañana miércoles alboreceremos con nobosidá baxa na fastera central asturiana, tando escampláu na cordelera y dellos valles del surocidente. Pali que pali dirán dixebrándose los estratos y abriéndose dellos claros, con unes temperatures que malpenes camudarán o descenderán llixeramente les másimes y subirán les mínimes. L’aire seguirá siendo variable y sele en xeneral con dalgo de nordés pela costa.

El xueves tendremos escasa nubosidá pela mañana, ellí onde nun se presenten los borrinos y nublines del alborecer que tenderán a dixebrase rápidamente. Ya pela tarde tendremos un aumentu de la nubosidá que mos dexará’l día nuble ya inclusu dalgún xarabatu de calter tormentosu na fastera más suroriental d’Asturies, con unes temperatures que camudarán poco, calteniéndose mui suaves.

Durante’l riscar del vienres va cruzanos un frente poco activu que mos apurrirá precipitaciones febles tendiendo a remitir pela mañana, quedando’l día con intervalos nubosos entemecidos ente dellos claros, cola posibilidá de dalguna gotera o xarabatín feble ya dispersu más probables al atapecer. Esti día l’aire del calambrión fadrá descender les temperatures bultablemente, dexándonos un ambiente serondín más que braniegu, con unes temperatures másimes que malpenes algamarán los 20ºC.

El sábadu sedrá un día pasáu por agua, con xarabataes frecuentes, descensu de les temperatures ya inclusu nieve nes cumes más altes de los Picos d’Europa, y ye que’l vientu del norte va canalizase dende llatiues mui altes, apurriéndonos una masa d’aire fría ya inestable.

El domingu, pali que pali, dirá meyorando de oeste a este, con tendencia a remitir les precipitaciones ya abrise dellos claros, sobre too pel ocidente.

Autor:

Maestra de Llingua Asturiana Colexu Carmen Ruiz-Tilve - Uviéu

Un comentario sobre “Estáu del Tiempu n´Asturies

Los comentarios están cerrados.