La flota del bonitu aumenta un 11% la so rentabilidá na costera d’anguaño, que se cerró ayeri con un balance de 986.716 quilos. La campaña desenvolvióse con normalidá y tolos barcos y rules tuvieron llibres d’andaes por coronavirus. Les captures nel Principáu caltienense l’alza y doblen les de va trés años
La flota asturiana ganó 3.937.000 euros na campaña del bonitu d’anguaño, un 11% más que na de 2019. La costera, que se cerró ayeri, desenvolviose con normalidá magar la crisis sanitaria y tanto los barcos como les rules tuvieron llibres d’andaes del Covid-19. Nesta ocasión, participaron 55 barcos, dos más que nel exerciciu pasáu, que prindaron 986.716 quilos. Esta cifra evidencia una enclín a l’alza nes captures, que dende 2017, con 426.000 quilos, dobláronse.
Nes rules asturianes, ente toles flotes (la del Principáu y les d’otres comunidaes), descargáronse 1.988.573 kilogramos. Los precios en primer vienta caltuviéronse ya inclusive en dalgunes rules superáronse los de 2019.
El preciu medio asitióse en 3,99 euros, polo que’l volume de vientes d’esta costera pa la flota de la comunidá algamó los 7.934.406 euros. L’añu pasáu, descargáronse 2.298.598 quilos que se vendieron a un costu mediu de 3,92 euros. La costera del bonitu empezó a mediaos de mayu con incertidume en relación a la rentabilidá de la campaña. Sicasí, el balance final ye más positivu qu’en 2019.
El tope de la cuota de bonitu afitase nos 16.620.000 quilos. La captura d’esta especie realizase por aciu pesca olímpica; esto ye, toles flotes pesquen lo que pueden cuanto antes. Anguaño, al igual que los dos anteriores, diéronse unes condiciones óptimes nel Golfu de Vizcaya, lo que favoreció un consumu mediu d’ente 150 y 200 tonelaes diaries. Por tollo, la costera cerróse prematuramente el 19 d’agostu, trés díes primero que la campaña pasada.
La pesquería del atún blancu (bonitu del norte) xestiónase al traviés del total almitible de captures (TAC) impuestu pola Comisión Internacional pal Caltenimientu del Atún Atlánticu (ICCAT). Anguaño va establecese un nuevu TAC pa los trés próximes costeres, lo que constata les fayadices esistencies de bonitu del norte. El Gobiernu d’Asturies confía en qu’esti fechu repercuta nuna mayor cuota pa 2021.
Fonte: Gobiernu del Principáu
