Publicado en NATURA

La lluna ta aferruñándose

La lluna ta aferruñándose y ye posible que sía por causa de la Tierra
Ver artículu orixinal 2020/09/08 n´Ecoosfera

Siendo un cuerpu celeste ensin osíxenu y ensin agua, la lluna ta aferruñándose y los astrónomos creen que ye por cuenta de la Tierra.

¿Por qué la lluna ta aferruñándose? Ye un fechu que’l satélite natural de la Tierra ta tiñéndose d’un llixeru color coloráu. Lamentablemente, les investigaciones apunten a que’l planeta qu’habitamos pue ser la razón.

Según astrónomos del Llaboratoriu de Propulsión a esquita de la NASA, na lluna afayáronse depósitos de hematita. Xusto na superficie del satélite, nes llatitúes altes, atopóse esti mineral del óxidu férrico.

La esplicación que toparon los astrónomos, acordies con los datos percanciaos pola misión Chandrayaan-1 de la India, ye que l’atmósfera de la Tierra podría tar lliberando osíxenu que vuela hasta la lluna y queda atrapáu nes altitúes más elevaes del satélite. Una vegada que l’osíxenu ta ende empieza’l tresformamientu del mineral, polo qu’ésti se torna acoloratáu.

L’óxidu ye la resultancia d’una reacción química bien común, siquier na Tierra. Ye posible velo en clavos, roques, fierros, etc. Inclusive ye bien común en Marte, pero nel satélite de la Tierra nun lo ye. La lluna ta aferruñándose y esto ye un fechu esconcertante. Según l’investigador Shuai Li del Institutu de Xeofísica y Planetología de Hawái, “la lluna ye una redolada tarrecible por que se forme óxidu”.

¿Cómo ye que la lluna ta aferruñándose?

En poques palabres, al esaminar les rexones polares del satélite atopóse qu’en delles característiques espectrales y patrones distintos esiste la firma de la hematita, esto ye, esti mineral ta presente na lluna.

“La nuesa hipótesis ye que la hematita llunar fórmase al traviés de la oxidación del fierro de la superficie llunar pol osíxenu de l’atmósfera cimera de la Tierra que foi de cutio abasnáu a la superficie llunar pol vientu solar”, amiesta Li.

Curiosamente, identificóse más hematita del llau cercanu de la lluna a la Tierra. Sicasí, l’ingrediente faltante pa esplicar el fechu de que la lluna ta aferruñándose ye l’agua. Acordies con los investigadores, les partícules de polvu que se mueven rápido topetando col satélite podríen lliberar molécules d’agua atrapaes na superficie de la lluna.

Esto implicaría’l descubrimientu d’agua na lluna. Ye según el fierro, l’agua y l’osíxenu entemecese hasta crear el tonu acoloratáu del satélite. Entá se precisen munchos más datos pa verificar esta esplicación, pero ye posible que cola misión Artumisa de la NASA llógrese verificar muncha más información.

Autor:

Maestra de Llingua Asturiana Colexu Carmen Ruiz-Tilve - Uviéu