Publicado en Sin categoría

Toles banderes d’asturies

¿Cuántes banderes tuvo Asturies? ¿Cuántes tien? Habrá quien diga qu’una namás. Otros dirán que namás tien una oficial y tien otres oficioses… Lo cierto ye que nenguna de les dos coses son ciertes. Asturies tien delles banderes oficiales (o, en tou casu, delles variantes d’una mesma bandera) y una bona riestra de banderes populares. Nesti artículu vamos facer un repasu de toes elles.

Les banderes oficiales: La bandera oficial “pura”:

La bandera oficial d’Asturies ye azul cola cruz de la victoria enriba. Esta cruz ha tar centrada y llevar embaxo una alfa y una omega. L’Alfa ye mayúscula y la omega minúscula. Primero de 1990 (añu nel que s’aprobó la llei de bandera), había munches versiones cola omega mayúscula, pos Xovellanos, el creador de la bandera, nunca especificó si éstes habíen ser mayúscules o minúscules. Hai que recordar que l’alfa y la omega nun tán presentes na cruz de la victoria, pero sí en bien d’eidificios públicos de Reinu d’Asturies como la fonte de Foncalada, n’Uviéu.

 

La bandera oficial pa mástil: Una variación de la bandera d’Asturies ye la bandera pa mástil, que desplaza la cruz de la victoria. L’envís col que se fai esto ye’l de permitir una mayor visibilidá de la bandera cuando nun ta ximelgándose al vientu. Esto ye una variación que s’inventa na Transición de la bandera d’Asturies y una alteración bastante grande. Supónse que la razón ye, en parte, imitar la disposición de la bandera española, na que l’Escudu ocupa esautamente la mesma posición na bandera (tanto la bandera franquista como la bandera republicana llevaben l’escudu centráu).

Flag of Asturias.svg

La bandera oficial de gala: Del mesmu mou que los militares tienen un uniforme de trabayu y otru de gala, n’Asturies pasa lo mesmo coles banderes. Como l’anterior del mástil, ye tamién una innovación de la Transición que nun tuvo nunca usu primero. Trátase d’una bandera bastante barroca na que la Cruz de la Victoria lluz les piedres precioses que tien la Cruz de la Victoria real (la xoya) col color y la disposición que tienen.

Esta bandera tan barroca úsase namás pa los díes de mayor respetu o gala. Por exemplu, nun s’emplegaría nunca pa un funeral como’l de les víctimes del Coronavirus, porque na conceición de “gala” hai un daqué festivu. Sí podría emplegase güei, 8 de Setiembre, perfeutamente.

Archivo:Flag of Asturias (gala).svg - Wikipedia, la enciclopedia libre

Les banderes históriques

Primero de la transición Asturies tuvo bien de banderes históriques; delles d’usu popular y otres d’usu más oficiales. En xeneral, nun hebo una gran variación al respeutu de la que ye anguaño la bandera oficial (del mesmu mou que nun la hai nes variantes que tien la bandera oficial).La bandera d’Asturies pre-Transición: La bandera d’Asturies pre-transición tien como principal carauterística que nenguna llei fixó nunca nin los colores esautos nin la disposición de los elementos (como, por exemplu, l’alfa y la omega que formaben parte d’ella). Esto débese a l’ausencia d’autonomía n’Asturies y, tamién, al fechu de que cuando Asturies algama la independencia en 1937 tien otros problemes munchísimo más importantes (nun perder una guerra) que ponese a fixar la bandera.

La principal diferencia que vemos pa cola bandera actual ye que la omega ye mayúscula. Esi usu dase a lo llargo de tol sieglu XX, y pue vese nos sellos y billetes oficiales qu’emitieron Asturies y Llión cuando fueron una república independiente baxo’l Conseyu Soberanu d’Asturies y Llión d’agostu de 1937 a ochobre d’esi mesmu añu.

Modelu de bandera emplegáu con calter previu a la transición.

La bandera del Exércitu Asturianu del sieglu XIX: La bandera militar L’orixe de la bandera, qu’hai que buscar en Xovellanos como bien indica’l youtuber Horros y Frixuelos nesti videu, tuvo una primer aplicación militar; que foi la de servir de bandera identificativa al Exércitu Asturianu que lluchó escontra Napoleón nel momentu en que la Xunta Xeneral proclamó la so soberanía en 1808.

Esta bandera tenía la divisa “Asturies xamás vencida” cosa qu’en cierta manera yera cierta: La pérdida d’autonomía y llibertaes n’Asturies nun fore nunca’l productu d’una guerra o d’una conquista, sinón más bien, les polítiques matrimoniales que fixeron que la monarquía llionesa perdiere puxu y autonomía.

Asturies xamas vencida
Bandera del Exércitu Asturianu de 1808

Si en dalgún momentu Asturies fore un estáu o tuviere competencies militares nuna eventual república española (como pasa colos Estaos d’Estaos Xuníos y l’emplegu que faen de la Guardia Nacional) paez afayadizo l’emplegu d’esta enseña como “bandera de guerra”,

Les propuestes de Xovellanos: Anque l’orixe de too ye l’informe que fixo Gaspar Melchor de Xovellanos nel qu’establez per primer vez una bandera p’Asturies. Concretamente defende l’usu d’una cruz de la victoria en plata (blanco en vexiloloxía) sobre fondo coloráu o azul. Les propuestes de Xovellanos, de llevase a la práutica, tendríen un aspeutu como ésti:

La bandera medieval d’Asturies:

Bandera del Reinu de Llión. La bandera medieval d’Asturies

Asturies tuvo otra bandera primero de les propuestes de Xovellanos, y una bandera que tien nel so haber el ser una de les banderes más vieyes d’Europa: El llión púrpura en fondu blancu.

Na Alta Edá Media (dómina na que falamos del Reinu d’Asturies) les banderes y los símbolos heráldicos tovía nun yeren una xeneralidá, como sí lo foi más alantre. El Reinu d’Asturies mueve la capital d’Uviéu a Llión nel añu 910 y alquiere esti nuevu nome. Sicasí, el reinu d’Asturies y el Reinu de Llión son la mesma entidá: Tienen la mesma dinastía, tienen la mesma llingua y tienen les mesmes lleis. Esta unidá ente Asturies y Llión dase hasta qu’en 1388 Xuan de Castiella dixebra Asturies de Llión como una política pa controlalos meyor. D’entós p’acá, l’alloñamientu ente llioneses y asturianos ye una realidá y la castellanización de dambos territorios (sobre manera de Llión) una política d’estáu de Castiella. Sicasí, la bandera histórica d’Asturies más antigua de toes ye’l llión pasante púrpura en fondu moráu del que tamién, como de la bandera que tenemos agora, hai bien de variantes.

Les banderes de llucha.

La bandera independentista Anque la bandera de guerra ye una bandera de llucha, pol so calter oficial nun la incluyimos equí. N’Asturies hai fundamentalmente dos banderes de llucha: la prieta y l’asturina.

Asturina con la estrella roja - Wikipedia, la enciclopedia libre
Asturina con cruz bermeya, símbolu del independentismu

La primera d’elles ye l’Asturian con cruz bermeya, una bandera creada a partir de la transición como una bandera de llucha d’Asturies. Al igual que pasa cola estalada, nun tien l’enfotu de sustituyir a la bandera oficial sinón más bien el de servir como bandera de llucha y d’identificación de los coleutivos y persones que nagüen pola independencia d’Asturies.

La bandera de duelgu: La bandera prieta d’Asturies tien un usu bastante reciente. Entamó a emplegase nel sieglu XXI y usóse como señal de duelgu énte socesos murnios o, tamién, como un símbolu de la minería. En munches ocasiones emplegóse como dambes coses: Un duelgu pola situación de la minería.

Bandera prieta,

 

Autor:

Maestra de Llingua Asturiana Colexu Carmen Ruiz-Tilve - Uviéu

Un comentario sobre “Toles banderes d’asturies

Los comentarios están cerrados.