Publicado en Cómic, Premios

XII premiu Alfonso Iglesias de Cómic

Alberto Vázquez García gana’l XII premiu Alfonso Iglesias de Cómic en llingua asturiana cola obra «El sol na escombrera».
El xuráu destaca l’”enfoque realista, la propuesta sobria y el dibuxu personal y característicu” del autor, que narra nel so trabayu la vida d’un neñu de la guerra asturianu. La obra «El sol na escombrera», del creador Alberto Vázquez, consiguió’l Premiu Alfonso Iglesias de Cómic en llingua asturiana d’anguaño, falláu ayeri n’Uviéu. El dibuxante mierense yá llograra’l gallardón na so novena edición col títulu «Los llazos coloraos».
El xuráu, que valoró “la variedá y l’interés” de tolos trabayos presentaos, destaca “l’enfoque realista y la propuesta sobria” de la obra ganadora, que narra la vida de José Fernández Sánchez, un neñu asturianu de la guerra, “un tema poco tratáu nes artes visuales”, según puntualiza l’acta de la deliberación.
El fallu señala tamién la calidá d’“un estilu de dibuxu característicu y personal, yá consolidáu”, y la brillante ellaboración d’una obra envuelta nun tonu de señardá que reflexa a la perfección el de les memories del protagonista” nes que se basa’l cómic.

Alberto Vázquez (Mieres, 1969) ye un artista gráficu, dibuxante, cortometrista y documentalista, autor d’obra tan reconocida como la mentada «Los llazos coloraos», y los documentales «1962. La lluz que vino del corazón de la tierra», «1965. Asaltu a la comisaría de Mieres» o «1934-1935. Diez asturianos nel exiliu francés». Vázquez ye tamién autor de numberoses tires cómiques en medios periodísticos asturianos.
El xuráu del premiu, que ta dotáu con 5.000 euros, tuvo presidíu pol director xeneral de Política Llingüística, Antón García, y formáu pola escritora Mariluz Pontón, la profesora Tamara Collar, la dibuxante Raquel Lagartos, la historiadora del arte Mercedes Menéndez, el creador Ruma Barbero, ganador de la última edición del gallardón, y Juncal García, qu’actuó como secretaria.

Autor:

Maestra de Llingua Asturiana Colexu Carmen Ruiz-Tilve - Uviéu