Calendariu Llunar de los Árboles

Los pueblos celtes d’Europa, ente ellos los ástures, rendíen cultu a la Naturaleza y daben importancia al ciclu solar y llunar, como puede notase nes festividaes y’l Calendariu Coligny. Tamién les fontes clásiques déxennos dellos pasaxes escritos sol tema:

“Dellos dicen que los callaicos nun tienen dioses; nun ansíina los celtí­beros y los demás pueblos que pol norte llenden con ellos, y toos rinden cultu nes noches de pleniluniu a un dios ensin nome, danciando les families fasta l’amanecerín ante les puertes de los llares“Estrabón, «Xeografía» 3,3, 7-8

La lluna yera bien güeyada y´l so ciclu taba sofitáu nes idegues de muerte, renacimientu y metempsícosis tan queríes por estos pueblos diversos.

Güei entamamos esti blog col calendariu llunar de los árboles, ye daqué moderno, pero inspiráo nel sentir d’estes xentes y les sos visiones so los árboles y biesques..

Ogham: RUIS / Piedra: acebache / Flor: llechera, tarriellu / Animal: cuervu

El nome de “xabú” vien del llatín sambucus y en griegu esistía’l términu sambyké, un préstamu oriental que venía a ser un arpa triangular. Anque nun sabemos si tien que ver, posiblemente ansina seya, porque paez que griegos y romanos facíen una especie de flautes d’esti árbol y, de la parte más dura, un instrumentu de cuerdes.

Ye un árbol asociau a les bruxes, diaños y xanes. Tamién solía asociase cola muerte; en Gales y la islla de Man plantábe xabú nes tumbes nueves, y si florecía, quería decir que l’éspíritu del muertu sería feliz na tierra del Tír na nÓg, del otru mundu, la Tierra de la Xuventú. Tamién se poníen rames dientru de la tumba pa protexer de la bruxería a la cadarma.

El xabú rexenérase constantemente poro ye un símbolu de camudamientu, de espoxigue espiritual y de resiliencia ante los retos que la vida nos trae. Ye entós un árbol que, por esto, paez conectanos cola sabiduría de los nuesos antepasaos y coles esperiencies que nos faen ser quienes somos. Tamién nos xune a la Vieya, a les xanes, a les dioses feminines y la so sabiduría de sieglos.

Hai que s’alcordar de l’emplegu medicinal del xabú que, siendo ricu en flavonoides, presenta propiedaes antiinflamatories que sofiten la salú inmunolóxica, protexen la piel, regulen la presión arterial y ameyoren les funciones cerebrales. Esta planta lleva calteniendo el so valor dende el Neolíticu, cuando los sos frutos yeren parviaos o na Dómina del Fierru, aú los druides emplegaben flores y frutos pol so valor terapéuticu. El vinu fecho colos frutos, nun yera pa cualquiera, sólo pa los sacerdotes iniciaos por ser entendío como un regalu de la diosa de la Tierra.

Ruis. Ye la lletra d’Ogham pal mes del xabú, cuando la gran fola torna a la mar, según se diz nel Canciu d’Amergin.

Acebache. Amuletu dende tiempu inmemorial poles propiedaes máxiques que se-y atribuíen tanto sanadores como pa la maxa. Los druides barruntaben que, amburándolo, espulsábense los diaños. N’Asturies, les cigües d’acebache protexíen escontra’l malgüeyu, especialmente a los ñeños. La costa de Xixón a Colunga ye aú se esplotó más el tipu esti de minería que amuesa l’acebache asturiano como el meyor del mundu xunto al de Whitby ( Reinu Xuníu).

Llechera o Tarriellu. Llámase llechera porque cuando la cortes, desprende un llíquidu cande apaecíu a la lleche. Ye una planta qu’espoxiga en cualquier condición y florez tou l’añu, poro asimilada al sol. Camentábase que yera un bon tónicu, rica en vitamina C, calciu y otros nutrientes. Esta enerxía xunto a la so resistencia nos diferentes climes relaciónala cola supervivencia y tien una venceyada asociación al mes del Xabú.

Cuervu. Animal sagráu que fai de mensaxeru ente’l mundu humanu y’l divinu, traía los mensaxes de los dioses. Taba asociau a la muerte y la batalla. Los celtes dexaben los cadabres nos campos de batalla pa que los cuervos los llevaran al Eidh, al Más Allá. Yera un animal místicu rellacionau cola maxa y les profecíes, preveíen sucesos futuros y revelaben secretos ocultos. Acompañante del Nuberu, Odín y Wotan, diferentes nomes pa un mesmu dios según les mitoloxíes asturiana, nórdica o xermana.

Personalidá de los Xabú

Xente que tiende a ser diferente, creativa y presenta la capacidá d’atalantar lo complexo de la vida y un grau grande de sabiduría anque-yos faiga viaxar lloñe p’atopala.

El so forte ye la intuición de tar no correcto, la paciencia y la disciplina. Son lluchadores fasta’l fin. Y, amás, présta-yos desafiar el poder establecíu y les regles si conlleven inxosticies. Son xente enérxico que esfruta d’activides na Ñatura. L’humor, normalmente irónicu, failos resilientes y siempre se noten diferentes a la mayoría de la xente, únicos, y especiales.