- RAITÁN s.m.: ‘Páxaru pequeñu de la familia Erithacus rubecula, de color amarronao con una franxa colorada en pechu y que canta perbién’.
- Nun hai muncha seguranza sobre l’orixe d’esta voz, anque la hipótesis más plausible ye la que suxer una formación a partir del participu del verbu llatinu RUBERE ‘ser, tar coloráu, vermeyu’, cola amestadura del sufixu -ANU: RUBITANU.
- La pérdida de -B- y l’armonización vocálica ruitán > «raitán» son fácilmente xustificables, pero non asina la non sonorización de -T- (¿posible xeminación espresiva llatinovulgar TT?).
- L’alusión al color vermeyu (o «rubiu») del páxaru vémosla n’otres voces que lu designen n’asturianu, como «papurrubiu», o n’otres llingües romances (cfr. gallegu «paporrubio» castellán «petirrojo», catalán «pit-roig», aragonés «papirroyo», italianu «pettirosso», etc.).
