El 10 d’avientu celébrase esti día con actos en munches ciudaes del mundu para concenciar y cavilgar sobro’l respetu que se debe tener escontra tolos seres del planeta, dando asina valor a la famosa frase de Mahatma Gandhi cuando dixo qu’un país o civilización puede xulgase na forma na que traten a los sos animales.
Pero los animales non solo tienen el so día internacional, sinón que tamién tienen una Declaración Universal de los Derechos de los Animales. Foi la Lliga Internacional de los Derechos de los Animales la organización que proclamó’l 15 d’ochobre de 1978 la Declaración Universal de los Derechos de los Animales. Sicasí entá queda muncho trabayu por que esta declaración sía aceptada a nivel global.
Los 14 artículos que conformen esta Declaración Universal, pueden sintetizase en cuatro derechos básicos: la vida, la llibertá, nun somete-y -yos a situaciones que-yos xeneren dolor, y nun consideralos propiedá.
Sicasí estos derechos son violaos acaldía en tol mundu. Los animales son consideraos como un meru recursu al serviciu del ser humanu, y ello ta alimentáu pol conceutu consumista de la nuesa sociedá.
Hai alternatives más étiques de satisfaer les necesidaes alimentarias, de vestimienta, de salú ya hixene ya inclusive d’ociu de los seres humanos. Y hai que xenerar un cambéu de conciencia pa consiguir que se respeten los derechos de los animales.
Numberamos delles coses que tu puedes faer pal bienestar animal:
- Evitar no posible o amenorgar el consumu de carne.
- Evitar consumir güevos procedentes de granxes onde los animales tán atarraquitaos y en males condiciones.
- Evitar l’usu de prendes de piel procedente d’animales.
- Evitar l’usu de cosméticos y productos de maquillaxe que nun respeten el bienestar animal.
- Nun asistir a espectáculos que pongan en práctica la crueldá colos animales.
- Lluchar contra l’abandonu d’animales de compañía.
- Nun mercar animales en tiendes sinón optar pola adopción.
Oxetivos del Desenvolvimientu Sostenible pal bienestar animal: - El bienestar animal incluyóse nos Oxetivos del Desenvolvimientu Sostenible pa 2030
- La ONU dio un pasu importante nel sentíu de la protección animal, yá que nos sos Oxetivos de Desenvolvimientu Sostenible pa 2030 da per primer vegada una posición relevante a esti asuntu. En concretu, l’oxetivu númberu 15 comprométese, ente otres coses, a protexer a les especies amenaciaes y poner fin a la caza furtiva y al tráficu d’especies protexíes.
En relación a esta celebración ye obligáu mentar que’l Día Mundial de los Animales celebra’l 2 d’ochobre coles mires de frenar la estinción de munches especies a lo llargo y anchu del mundu.
