- SESTAFERIA s.f.: ‘Trabayu, xornada que dediquen los vecinos d’un pueblu pa iguar a comuña los caminos, y que suel (solía) facese de vienres’.
- A partir de la construcción llatina SEXTA FERIA alcuñóse’l nome d’un día concretu de la selmana: el vienres (esto ye, el sestu día dende’l domingu).
- Esta manera d’identificar los díes de la selmana, tapeciendo les referencies paganes qu’impliquen les fórmules del tipu «xenitivu (MARTIS, IOVIS, VENERIS) + DIES», afitóse plenamente solo en portugués.
- Pero queden restos nel noroeste peninsular. Asina por exemplu, n’asturianu, onde acabó trunfando la denominación VENERIS (DIES) > «vienres», el siguidor de SEXTA FERIA pervive nuna voz qu’alude a los trabayos vecinales d’arreglu de caminos qu’avezaben a facese los vienres. Otros derivaos: «sestaferiar», «sestaferiador», etc.
