- Musicasturiana.com / maqueta: siéntila equí / ‘Yá llegó la hora’ de Güerku (2001)
- Dixitalizamos el trabayu qu’asoleyó esta formación candasina de música punk-rap con cinco temes que falen del contestu social del so conceyu.
- 01. El Mineru / 02. Yá llegó la hora / 03. Cantu’l Güerku / 04. The Bonguis / 05. La Historia Interminable
El documentu sonoru qu’asoleyamos agora nel AMCA trátase d’una casete de Güerku, formación punk-rap creada nel añu 2000 en Candás que sacó una maqueta de manera autoxestionaria en 2001 con cinco temes que falen de la so realidá y el constestu social del so conceyu.
A finales de los años 90 y principios de los 2000 el rock en llingua asturiana esperimenta un procesu de surdimientu y consolidación; nesa dómina cuenta yá con referentes claros como Dixebra o Los Berrones, a los que sigue un relevu protagonizáu por Avientu o Skama la Rede. La escolarización de la llingua asturiana llega a miles d’escolinos y el llabor d’estes bandes escomienza a utilizase como material de trabayu pa espardir un ambiente positivu hacia l’asturianu. Nesi contestu nacen formaciones integraes por componentes mui mozos qu’intenten abrise camín. Ente l’autoxestion y l’apoyu de la compañía Discos L’Aguañaz van dando a conocer la so xera, xeneralmente con un mesmu patrón, caracterizáu por un soníu xeneralmente punk-folk —col emplegu de la gaita como seña d’identidá— y unes lletres combatives y mui comprometíes social y políticamente.
El trabayu discográficu que diba dar carta de naturaleza a esta escena foi’l compilatoriu tituláu Rock’n’llingua (2004), qu’axuntaba a seis d’aquelles bandes noveles: Skontra, Oi! N’Ast, Güerku, La Tarrancha, Falkatrúa y Milicia Astur, aportando caúna d’elles un par de pieces. Unes más rockeres, otres más punkis, delles más folkis, dalguna reggae-skatalitica… pero toes con un denominador común: l’emplegu de la llingua asturiana y unos testos apegaos a la realidá del país. A estes bandes habría qu’amestar otres dos que tamién tuvieron relevancia nesta escena, como foron Gomeru y Fala Non Caduca.
Una d’aquelles formaciones, Güerku, naciere un tiempu enantes en Candás, concretamente nel añu 2000, dándose a conocer na so redolada, participando n’eventos como la Nueche Celta que daquella s’entamaba na so ciudá y n’otros del mesmu calter. Nel 2002 participen nel discu tituláu Astursónicu’02. Ke nun nos zarren la boca, nel que cuatro bandes (Dixebra, Milicia Astur, Kamín K’alluma y Güerku) comparten delles de les sos composiciones; los candasinos aporten cuatro pieces a esti recopilatoriu de Rock Astur. Enantes d’ello grabaren una maqueta con cinco cortes titulada Yá llegó la hora, que distribuyeron en llocales de la so zona y espardieron de manera autoxestionaria. Nella apréciase a les clares el so estilu mecigayu de punk-rap, calistrao especialmente pol folk, con unes lletres que falen de la realidá que los arrodia y del contestu social del so conceyu.
