Vixil ye’l proyectu propiu de tecnopop y ambient que Luis Sánchez -que yá perteneciera al grupu sierense Lavandera- entamó va cinco años na busca de nueves sonoridaes. En 2023 autoeditó’l so primer discu Adulces «restolando col ruíu», como comenta’l músicu. El so últimu llanzamientu ye SECRA, un EP de cuatro temes con protagonismu de la guitarra y mayor presencia de la voz.
«Intenté volver garrar la guitarra pa sacar arreglinos o dibuxinos que conformasen el late motiv de la canción, como ye’l casu de la primera, ‘Ónde ta Mino’». Asina describe Luis Sánchez l’entamu de SECRA, un discu que destaca, no instrumental, pola combinación de la guitarra y los soníos electrónicos de percusión de plaques y teclaos; y, no vocal, por dos temes cantaos que falen de personaxes «perdedores» con dificultaes físiques o mentales p’algamar aquello polo que nagüen. ‘Ónde ta Mino‘ -acompañáu del so videoclip- y ‘Áscora encarná‘ son los dos cantares onde pueden sentises estes histories. Sicasí, ‘Una triste comedia‘ y ‘S.E.C.R.A.‘ son dos temes instrumentales y ambientales empobinaos a la pista de baille.
Per otru llau, el so anterior trabayu, Adulces, ye un LP d’once pistes, la mayor parte d’elles instrumentales, nos que les lletres manifiéstense nuna voz non cantada sinón programada al traviés d’un llector de testos dixital. Ye un exemplu de la esploración que Luis Sánchez quería entamar con Vixil y que nesti últimu EP, SECRA, dirixe a sonoridaes menos paisaxístiques y más cercanes al pop col qu’entamó la so andadura musical.
/ 
