- Fonte: Musicasturiana.com / Semeyes de José Álvarez
«Nos años 70 y 80 había un gran puxu del asociacionismu
y foi lo qu’emburrió la creación
de los grupos d’investigación etnográfica»
La Flor de Grau ye una nueva asociación que trabaya nel so conceyu por caltener y esparder el folclore d’Asturies. La so presentación oficial foi esti vienres pasáu na Capiella los Dolores dempués de formase nel branu de 2024 y participar en dellos eventos como’l Día’l Traxe’l País, la Seronda en Danza de Grau, la Xuntanza de los Sones de la Navidá y el Conciertu de Músicos Quirosanos organizáu pola BG Teixo-Manolo Quirós.
Dende ochobre, amuesen el so enfotu pedagóxicu coles clases de pandereta y baille tradicional qu’imparte Paz Mesa selmanalmente en La Panera, amás d’otros talleres puntuales. Falamos coles persones que la formen pa conocer de primer mano’l so llabor, oxetivos, estayes d’estudiu y, tamién, la so opinión sobre la situación de la música tradicional anguaño.
Primero de too, ¿qué tal foi la presentación del vienres?
La presentación foi increyible. Nun esperábemos una rempuesta tan positiva per parte de tola xente qu’abarrotó la Capiella Los Dolores. Pa nós foi bien gratificante atopanos con vecinos de Grau y con xente de fuera, non solo rellacionaos col mundu del folclore, sinón tamién col de la cultura asturiana. Cuando terminamos, los asistentes treslladáronnos lo muncho que teníen esfrutao cola nuesa propuesta, lo que nos anima a siguir trabayando nesa llinia.
Volviendo a l’aniciu, ¿podéis contanos por qué decidisteis crear La Flor de Grau? Anguaño, la manera que tenemos n’Asturies de rellacionanos col folclore ye al traviés de grupos que permiten que persones coles mesmes inquietúes podamos compartir, deprender y divulgar lo que sabemos a la sociedá. Ye una xera de deprendizaxe y d’espardimientu. Poro, debío a la carencia d’esta propuesta nel conceyu de Grau, decidimos crear esta asociación.
«La manera que tenemos n’Asturies de rellacionanos col folclore ye al traviés de grupos que permiten que podamos compartir, deprender y divulgar lo que sabemos. Vimos una carencia en Grau y decidimos crear l’asociación»
¿Cuálos son los vuestros oxetivos como asociación? Planteámonos dende l’entamu que l’asociación nun diba llendase a baillar delantre d’un públicu, sinón que queríemos abarcar munchos otros aspeutos que s’inclúin nel folclore: talleres, charres, xornaes o esposiciones sobre dellos aspectos como la indumentaria, la gaita, la pandereta, la música con instrumentación, etc. Amás, también pretendemos ampliar el nuesu conocimientu al traviés de delles collaboraciones.
«Queríemos abarcar munchos otros aspeutos que s’inclúin nel folclore: talleres, charres, xornaes o esposiciones. Tamién ampliar el nuesu conocimientu al traviés de collaboraciones»
Estrenastisvos nel Día’l Traxe’l País, ¿qué llugar ocupa la indumentaria tradicional asturiana nel vuestru proyectu? Pa nós, ocupa un llugar fundamental. En Grau, dende qu’entamó a celebrase’l Día’l Traxe diose-y un bon emburrión a la indumentaria. Tolos miembros de La Flor de Grau, d’una u otra manera, tamos venceyaos a la creación d’unos traxes qu’intenten ser recreación d’aquellos del sieglu XIX que llevaren los nuesos antepasaos. Nel conceyu, cuntamos con bien de propuestes venceyaes cola indumentaria: hai esposiciones, estudios históricos, talleres de costura, charres, que creen un clima propiciu pa que la xente s’interese más pola indumentaria y, a su vez, fai que la nuesa asociación lo contemple como un valor que cuidamos con especial precuru.
Amás de les actuaciones, impartís clases de pandereta y baille tradicional, y amosáis el vuestru enfotu pedagóxicu con dellos talleres de gaita y indumentaria, ¿tenéis pensao aumentar la estaya de formación? ¿Podéis avanzanos dalgo?
Ye verdá, la formación constitúi un pegoyu básicu na nuesa asociación. Sí, hasta agora ufiertamos un taller d’averamientu a la gaita impartíu por Luis Pola, con munchu ésitu de convocatoria. Mesmamente, esta selmana vamos facer un taller de texíu de medies empobináu a deprender a facer unes medies pa gastar col traxe’l país. Esti taller va guialu Paz Mesa y pensamos que yera necesario porque la mayoría de la xente que facía esta xera ta dexándonos. Paeznos fundamental recuperar la tresmisión d’esi conocimientu. Tamos rematando’l diseñu d’otros talleres que van ver la lluz próximamente.
«Esta selmana vamos facer un taller de texíu de medies pa gastar col traxe’l país. Va guialu Paz Mesa y pensamos que yera necesario porque la mayoría de la xente que facía esta xera ta dexándonos»
Paez que dende va años tamos viviendo un surdimientu nel mundu de la pandereta y el baille tradicional, ¿veislo asina? ¿Por qué creéis que ye? De xuru qu’hai un surdimientu nestos años del mundu de la pandereta y tien muncho que ver col movimientu reivindicativu de la igualdá de la muyer. Nos años 90 tuvimos un boom de la gaita que yera un instrumentu mayormente masculín. Agora ta tendiéndose nel mundu del folclore a un equilibriu na instrumentación cola llegada masiva de muyeres pandereta en mano.
«El surdimientu nestos años del mundu de la pandereta tien que ver col movimientu reivindicativu de la igualdá de la muyer»
De toles maneres, anque nestos años sí se fundaron delles bandes de gaites, nun hebo nin grupos etnográficos nin grupos de baille nuevos, ¿qué razones pue haber detrás? Creyemos que se debe a un cambéu de formatu. Enantes, pa baillar, teníes que dir a un grupu. Agora, amás de grupos, hai escueles de baille. Tamién hai que tener en cuenta l’individualismu creciente de la sociedá, lo que provoca qu’haya xente que solo quiera pagar una clase pa baillar ensin comprometese con una asociación, que conlleva trabayar ya implicase. Nos años 70 y 80, cuando se crearon los grupos d’investigación etnográfica, había un gran puxu del asociacionismu en xeneral y foi lo qu’emburrió la creación d’estos.
«Anguaño hai un individualismu creciente na sociedá. La xente namás quier pagar una clase pa baillar ensin comprometese con una asociación»
El Conceyu Grau ta entamando y sofitando cada vegada más eventos venceyaos a la cultura y la música asturiana, ¿por qué creéis que ye? Tenemos que tener en cuenta que la base de la situación actual ta rellacionada con qu’hubo dos conceyales nes llexislatures anteriores -Elsa Suárez y Plácido Rodríguez- que creyíen nun proyectu con una visión propia d’Asturies de la cultura.
Nesi sen, anque la situación seya meyor que n’otros conceyos, ¿qué propuestes-y fadríeis a la Conceyalía de Cultura? A la Conceyalía de Cultura del Conceyu de Grau solo-y pedimos un apoyu real a les asociaciones que queremos tirar pola cultura nesti conceyu.
«La rellación ente l’asociacionismu cultural asturianu debería tar apoyada dende la Conseyería de Cultura»
¿Y a otros conceyos d’Asturies? Quiciabes deberíemos pensar que la rellación ente l’asociacionismu cultural asturianu debería tar apoyada dende la Conseyería de Cultura.
Si podemos conocer el patrimoniu oral y musical del país ye gracies a asociaciones como Muyeres o L’Andecha Folclor d’Uviéu y otres iniciatives como l’ATOAM que, dende va décades, vienen desendolcando un trabayu escomanáu pa caltenelu, ¿fai falta más apoyu institucional? ¿Qué debiera facer el Gobiernu d’Asturies pa ocupase -anque tarde- d’esta xera?
Como dixo na presentación una de les nueses socies, ta too por facer. La xera ye escomanada, pero pocos pasos que se den, dannos esperanza de qu’igual se revierta esta situación.
