Llevólu’l Sumiciu toma Xixón: telonéu a Baiuca, conciertos na Llaboral y xunto a Ferla Megía. El dúu d’electrónica de raigañu va dar ente’l 28 de marzu y 19 d’abril cuatro conciertos con aforos y formatos bien estremaos.
- Fonte: Músicasturiana.com /
El dúu d’electrónica de raigañu Llevólu’l Sumiciu nun apara. Tres de llanzar el pasáu payares el so segundu EP, La Llobera, los hermanos Pablo y David Alonso siguen dando novedaes y agora anuncien cuatro conciertos en Xixón ente’l 28 de marzu y el 19 d’abril. Toos ellos n’espacios estremaos y con distintos aforos y formatos.
La primera de les cites -con toles entraes vendíes- ye esti sábadu 28 na sala Albéniz onde van telonear al gallegu Baiuca, el nome más destacáu de la electrónica de raigañu agora mesmo nel Estáu español. El 5 d’abril a les 21h y con entrada llibre aporten a LLABoral Centru d’Arte y Creación Industrial, espaciu onde fixeron una residencia artística col proyectu Pixeirada. El miércoles 9 d’abril a les 21h actúen dientro del alcuentru Música en Rede nes cocines vieyes de La Llaboral, no que promete ser un conciertu bien orixinal; y, pa rematar, el 19 d’abril van tar na sala Tizón xunto a Ferla Megía. Esti últimu va ser a les 20.30h y les entraes yá tán a la venta por 10 euros.
Con estos conciertos el dúu sigue presentando’l so trabayu discográficu nuevu. Nél presenten cinco temes nos qu’hai composiciones propies, reellaboraciones de pieces tradicionales y unes influencies sonores que van dende l’asturianada y les vaqueires hasta’l dembow y los ritmos afrollatinos. Too ello col telón de fondu de la historia d’Ana María García ‘La Llobera’.
