- Fonte: LNE / Marvel Youtube /
Uviéu ya lluci n’Hollywood: desvelen nueves imaxes del Calatrava en «Los Cuatro Fantásticos». L’estrenu del tráiler oficial de «Los Cuatro Fantásticos: Primeros pasos» amuesa nueves imaxes del rodaxe desenvueltu n’Uviéu en payares. L’estrenu en cines, tanto n’Estaos Xuníos como n’España, va ser el 25 de xunetu.
El pasáu 17 de payares, un Antonov-12, un enorme avión de carga d’orixe soviéticu, aterrizaba nel Aeropuertu d’Asturies xenerando gran espectación ente los aficionaos de l’aeronáutica. La nave llegó cargada colos equipos pa rodar delles escenes de la película de Marvel «Los Cuatro Fantásticos: Primeros pasos». Con ella llegó un batallón de 400 persones que mientres una selmana convirtieron el Calatrava nun estudiu cinematográficu.
Güei yá ye oficial. Marvel llanzó’l tráiler definitivu de la película. En daqué menos de trés minutos preséntase énte l’espectador esta nueva propuesta de supehéroes ambientá nos años 60. Y Uviéu apaez n’este aperitivu con delles escenes de la película rodaes nel hall y otres partes del Palaciu d’Esposiciones y Congresos.
Uuna de les escenes más llamatives asísitiase nel hall del edificiu de Buenavista, onde los protagonistes, los actores Vanessa Kirby (la Muyer Invisible), Joseph Quinn (l’Antorcha Humana), Ebon Moss-Bachrach (La Cosa) y Pedro Pascal (Míster Fantásticu), caminen ente una nube de periodistes. Unu d’ellos llanza la entruga: «¿Tamos a salvo?». A la que Pedro Pascal respuende: «Nun lo sé».
Na escena identifícase perfectamente la estructura del Calatrava, el llugar escoyíu pola producción p’asitiar ellí un ficticiu edificiu de la Fundación Futuru, na película una suerte de see de les Naciones Xuníes, onde los mandatarios s’axunten pa faer frente a una crisis global.
Marvel apostó nel so escenariu uvieín por una estética retro y futurista coles mesmes pa esta película ambientá n’un Manhattan de los años 60 del sieglu pasáu.
L’estrenu en cines, tanto n’Estaos Xuníos como n’España, va ser el 25 de xunetu. Y xuntu col tráiler, Marvel tamién s’espublizó otru póster oficial de la película.
La película sigue a la icónica «Primer Familia de Marvel» énte un gran desafíu. Los protagonistes son tienen de permediar los sos roles como superhéroes y como familia mientres s’enfrenten a l’amenaza cósmica de Galactus (Ralph Ineson) y el so heraldu, Silver Surfer (Julia Garner).
El pasáu febreru yá se publicara un adelantu del tráiler nel que pudieron vese otres escenes nes qu’el hall del edificiu diseñáu por Santiago Calatrava apaez totalmente anováu. El llugar onde los neños esperen pacientemente pa ver a los Reis Magos, o se celebren los picoteos cuando se celebra un congresu, convertiose nun gran salón con elevador con grandes sofás de color azul y coxinos marrones. Nel centru puede vese una gran chimenea que cuelga del techu y, al fondu, la cristalera, la característica terraza –tamién con distintu moblame– y la barandiella.
El rodaxe de la película supunxo un revulsivo económicu pa la ciudá’l pasáu payares, pos el personal del rodaxe enllenó dos hoteles y dexóse ver por dellos restoranes de la ciudá mientres tola selmana, incluyíos los sos protagonistes. Nel casu de Pedro Pascal y Joseph Quinn tuvieron un gran xestu, diendo visitar a los alumnos del colexu Buenavista II, asitiáu xusto enfrente del Calatrava.
