La guirria recibe l’Añu Nuevu en Ponga achuchando y besando a les muyeres y llanzando ceniza a los homes. Cientos de persones participaron ayeri en Beleñu, n’una de les fiestes más singulares d’Asturies, protagonizada por un míticu personaxe amazcaráu, escoltáu per cerca de 40 de caballeros.
Hai munches formes de celebrar l’Añu Nuevu, pero poques tan interesaes y risonderes como la de San Juan de Beleñu, en Ponga. Cientos de persones, atraíes pol bon tiempu y lo curioso del festexu, axuntáronse ayeri nes cais de la capital del conceyu pa esfrutar d’una tradición ancestral que cada vez tien más impulsu. El sol al filu del mediudía empezaba a avivar los nervios d’aquellos qu’aguardaben con ganes la llegada de la guirria, el principal protagonista d’esta xornada festiva.
«Ye la primer vegada que venimos. Tenemos amigos que son d’equí y faláronnos de la fiesta. ¿Qué meyor plan pa venir con neños y enriba con un día como este?», señaló Alejandro Vallina, de Xixón. L’españíu de los voladores anunció que yeren los dolce en puntu y, de sópitu, un personaxe amarutáu y mazcaráu apaeció corriendo a gran velocidá y armando una bona movición.
Como manda la tradición, la guirria percorrió la localidá partiendo suerte con besos y abrazos a les muyeres y llanzando ceniza a los homes: «Trátase de dir felicitando l’añu nuevu a los vecinos d’esta manera especial y de pasalo bien», esplicó David Granda.
El secretu meyor guardáu. La guirria travesó la capital pongueta dando saltos y afarando con tou. Llegó inclusive a colase na terraza d’una casa pa llograr achuchar a una vecina y, pola so efusividá, acabó cayendo ente rises con otra nuna pequena cuneta antes de xubise al llombu d’un caballu: «Yá toi notando’l cansanciu», comentó dempués de la so gran carrera la guirria d’anguaño, que yá lo foi n’otra ocasión. La so identidá ye un misteriu que nun se puede desvelar, tal que esplica él mesmu. Ye «un secretu». El secretu meyor guardáu de la xornada en Ponga.
Ponga arrinca l’añu cola Guirria faciendo de les suyes/J. QUINCE
La fiesta empieza en realidá l’últimu día del añu, previu a esta celebración, cuando se decide quien va encarnar a esti singular personaxe mitolóxicu, y realízase un sortéu pa empareyar a los solteros y solteres mayores de 15 años, metiendo tolos nomes en dos cántaros: «Ayeri diéronnos unes papeletes y güei tengo qu’apurrir a les moces, sale la guirria y pidimos l’aguilandu», resumió Granda.
Salieron 29 pareyes y dalguna moza quedó «en cántaru», ensin pareya, anguaño. Granda foi unu de los casi 40 caballeros que formaron parte del cortexu de la guirria, que percorrió Cainava y Beleñu en busca de viandes, bebíes y dineru. D’ellos, los mayores de 15 años, 26, escoltaron a la guirria a caballu, ente que una docena de neños ficíerenlo en burru, acompañaos polos sos familiares.
Son los varones los que cumplen con esta misión, pero elles tamién participen na fiesta: Solo remanase los xumentos los mozos, pero les moces tamién pueden montase con ellos, na grupa. «A mi lo que más me gusta ye dir pidiendo poles cases l’aguilandu y cantando los cantares tradicionales», apuntó la pequeña Silvia Velasco, de diez años.
