- ¿CONOCES LA LLEENDA DE SAN XURDE Y EL DRAGÓN? Dende’l sieglu IX, la fascinante historia de cómo San Xurde mató a un dragón dio orixe a innumberables cuentos populares europeos.
- ¿POR QUÉ SAN XURDE TA RELLACIONÁU COL DÍA DEL LLIBRU? Por una feliz coincidencia, la festividá de San Xurde ye’l 23 d’abril y el Día del Llibru celébrase n’España nesa fecha dende l’añu 1931 y en tol mundu dende 1995.
- ¿POR QUÉ CELEBRAMOS AGORA SAN XURDE N’ASTURIES? Na nuestra tierra, delles lleendes rellacionen al santu caballeru col cuélebre, la criatura mitolóxica asturiana. Quizá la más conocida seya la de Zalón (Ayande), onde cuenten que San Xurde, ayudáu por unos monxos martirizaos pol culiebrón, preparó una rosca de pan enllena d’alfileres y piedres en caldia qu’aventó a la boca de la bestia mientres-y clavaba una llanza.
- ¿Y SI XUNTAMOS LA LLEENDA DE SAN XURDE COL DÍA DEL LLIBRU N’ASTURIES…? Pa esti 2025, el Gremiu d’Editores d’Asturies en xuntanza col Gobiernu del Principáu d’Asturies y los sectores de la panadería y pastelería, la confitería artesana, la producción de miel, el comerciu, les biblioteques públiques y les llibreríes asturianes proponémos te da-y una forma nueva a estes tradiciones vinculando los llibros cola rosca de San Xurde un deliciosu productu creáu a costafecha pa esti día siguiendo recetes tradicionales de la nuestra tierra.
Pues un productu artesanu fechu poles panaderíes y confiteríes asturianes sólo pa esti día, con ingredientes del país:
Rosca salada: pan con rellenu de chorizu.
Rosca dulce: brioche tienru con cobertoria de nuez y escames de cuélebre, endulzáu con Miel d’Asturies IXP.
La Conseyería de Cultura, Política Llingüística y Deporte presentó la celebración de San Xurde pa festexar el Día del Llibru n’Asturies. Una iniciativa conxunta del Principáu colos gremios d’editores, llibreríes, comercios, confiteríes, panaderíes, biblioteques y Miel d’Asturies IXP. L’actu de presentación fíxose no que yeren les cocines de La Llaboral.
La propuesta nueva impulsada por Cultura ta destinada a convertise nuna tradición asturiana vinculada al 23 d’abril, Día Internacional del Llibru. Baxo la idea de regalar llibros y les rosques creaes y cocinaes pa la ocasión por confiteríes y panaderíes asturianes, esta iniciativa naz col propósitu de popularizar la figura de San Xurde, patrón de dellos conceyos asturianos y protagonista de lleendes locales como la del cuélebre de Zalón (Ayande), pa convertilu n’iconu de la fiesta asturiana del llibru.
La propuesta, frutu de la collaboración ente’l sector editorial, panaderu, confiteru, apícola y comercial del Principáu, propón celebrar esta xornada con un xestu doble: regalar un llibru y una rosca de San Xurde, ellaborada artesanalmente en dos versiones —salada y dulce— por panaderíes y confiteríes de dellos puntos d’Asturies. Les rosques van tar disponibles en tamañu individual y con ingredientes de calidá como’l miel d’Asturies IXP.
La festividá nueva busca fomentar la llectura, dinamizar el comerciu local y promover la producción cultural asturiana al traviés d’una celebración singular y enraigonada n’elementos propios de la identidá asturiana. Amás, quier crease un vínculu ente’l llibru y la tradición, facilitando asina la participación ciudadana alredor d’una fecha simbólica.
