El Principáu presentó güei esta campaña. La marca calidable Alimentos del Paraísu Natural va participar nel Xixón Life 2025, que se va celebrar del 16 al 26 de xunetu, y nel Tsunami Xixón, los díes 18 y 19. Dambos eventos van axuntar a barganal de 60.000 asistentes, lo que representa una oportunidá estratéxica para dar visibilidá a los productos asturianos con sellu calidable.
El conseyeru de Mediu Rural, Marcelino Marcos, sorrayó qu’esta iniciativa va dexar averar los productos certificaos a un públicu amplio y diverso, aprovechando’l gran impactu que xeneren estos festivales en medios tradicionales y en redes sociales.
Xixón Life 2025 va atraer a miles de persones coles actuaciones d’artistes de sonadía como Joaquín Sabina, Juan Luis Guerra o Leiva. Pela so parte, el Tsunami Xixón consolídase como unu de los festivales de música alternativa más importantes del norte d’España, con un cartelu qu’inclúi a Sex Pistols, Refused, Kase.O, Thirty Seconds to Mars, Zebrahead, Alcalá Norte, Big Special y Viva Belgrado, ente otros.
En dambos festivales, Alimentos del Paraísu Natural y les marques con denominación d’orixe protexida (DOP), indicación xeográfica protexía (IGP) y certificación ecolóxica van tener xuna presencia destacada, tanto en soportes gráficos y audiovisuales como n’espacios físicos. Amás, va habilitase un puntu de promoción en zones de gran arribación pa dar visibilidá al sellu y facilitar l’espardimientu de los productos.
El Gobiernu d’Asturies busca con esta acción impulsar el consumu de productos locales calidable y fomentar un turismu sostenible y responsable, según consolidar la imaxe del Principáu como destín gastronómicu y cultural de referencia.
