Rocío Bueno, de la Quesería Asiegu, estremada col Premiu Muyer Rural 2025. Al pie de la so pareya, ellaboren dende 2020 l’únicu Cabrales ecolóxicu d’esta Denominación d’Orixe. El Fielato / Quesería Asiegu /
El Colectivu de Muyeres Rurales del Oriente d’Asturies otorgó’l Premiu Muyer Rural 2025 a Rocío Bueno, de la cabraliega Quesería Asiegu. Un galardón col qu’esta organización quier reconocer la so destacada «trayectoria vital y profesional venceyada al territoriu, el so firme compromisu cola igualdá y el so relevante valor na defensa de la promoción del mediu rural asturianu».
Esti colectivu pon en valor que la homenaxada desenvolvió «una intensa actividá en favor del desenvolvimientu sostenible del campu asturiano, combinando la innovación col respectu poles tradiciones rurales». Daqué que sumáu al so «impulsu a proyectos d’emprendimiento femenín, la so implicación n’iniciatives de la economía social y el so papel activu na dinamización de la comunidá rural convirtiose nun referente pa les muyeres del Oriente d’Asturies». Con esti premiu, el colectivu quier «reconocer l’esfuerzu, la valentía y la capacidá tresformadora de les muyeres que sostienen la vida nos pueblos, contribuyendo a caltener viva la identidá rural y a construyir un futuru con igualdá y oportunidaes pa toos».
Esta reconocencia, que se va apurrirse el próximu 21 d’ochobre nel edificiu de les antigües escueles d’Asiegu, nel conceyu de Cabrales; Rocío Bueno asegura sentise «nerviosa, emocionada y estimosa a la vida por vivir onde soi feliz, n’Asiegu, onde veo a les mios fíes esfrutar d’una infancia como la que yo tuvi; esfrutando de cada llogru que consiguimos nesti pequenu pueblu coles nueses iniciatives vecinales y onde, nel ámbitu profesional, tamos llevando a cabu esta romántica llocura que va años metiósenos na cabeza a Pablo y a mi, d’entamar nesta particular forma de vida».
Esa llocura» a la que Rocío Bueno fai alusión na so publicación de Facebook nun ye otra que la quesería que rexenta xuntu cola so pareya y qu’ellabora dende 2020 l’únicu Cabrales ecolóxicu qu’esiste na DOP Cabrales, producíu íntegramente con lleche de vaca; y, dende 2022, un quesu denomináu «El Xigante» que tien la particularidá de tener una cubierta de flores comestibles.
