Güei presentóse la programación de les Xornaes de la Música Tradicional Asturiana, un eventu que va desendolcase el 8 y 11 d’avientu en @laboralciudadcultura y que va entemecer conciertos, meses redondes y exhibiciones al rodiu la tradición sonora del país. La cita va reunir a más de 260 participantes, ente intérpretes, investigadores y docentes y ta promovida y financiada por @culturaast en collaboración col @conceyudelagaita y ye gratuita, teniendo qu’inscribise previamente la xente a traviés d’Internet. Musicasturiana.com
Estes xornaes van reunir a más de 260 participantes, ente intérpretes, investigadores y docentes col oxetivu de «fortalecer la música tradicional y ampliar la so proyección social y tresmisión». El bayurosu programa va ufrir na mañana del primer día, llunes 8, trés meses redondes. La primer d’elles arranca a les 10h, dempués de la inauguración institucional al cargu de Vanessa Gutiérrez, y col títulu L’aniciu de les escueles de música tradicional n’Asturies: los años 70’ y 80’, intervienen Xuacu Amieva, Pedro Pangua, José Ángel Hevia, Santi Caleya y Carlos Núñez. Pa les 11h ye la de Modelos d’enseñanza de música tradicional n’Europa: Bretaña, el casu Sonerion na que participen Lisardo Lombardía y el presidente de la confederación de gaiteros bretones, Maïna Daouphards.
Les escueles de música tradicional actuales van tener el protagonismu nel restu la xornada del llunes 8. A les 12.30h ye la mesa Les escueles de música tradicional anguaño: retos y desafíos na que participen los docentes de les Escueles Municipales de Música de Cangues d’Onís (Guillermo Pérez), Castrillón (José Manuel Tejedor), Nava (Pedro Pangua), Navia (Luis Feito) y Tinéu/Cangas del Narcea (David Varela); los de les Escueles de Música Tradicional d’Ayer (Diego Lobo), Guadarrama (José Luis de la Cera), Noreña (Chus Solís) y Quirós (Luis Francisco Álvarez Pola); y Pablo Carrera de l’academia privada A Mansalva. Pela tarde, dende les 18h, el Teatru de La Llaboral celebra l’Alcuentru d’agrupaciones d’escueles municipales y tradicionales de música con actuaciones d’alumnáu de la Bandina Infantil de Gaites «Salia» de Ribeseya, La Tarabica de Guadarrama, La Quintana de Xixón, Noreña, A Mansalva, El Gumial y Saxum.
Gaites del mundu
La segunda xornada, la del xueves 11, va tar dedicada dafechu la gaita. A les 11h ye la mesa redonda La fabricación de les gaites anguaño: presente y llinies d’investigación na que participen Berto Fernández, Vicente Prado «El Pravianu«, Chus Solís, Iván González y David López. A les 17h la Sala de Pintures de La Llaboral va acoyer les Muestres-conciertu d’intérpretes: gaites del mundu cola participación de José Manuel Tejedor (Asturies), Fred Morrison (Escocia), David Bellas (Galicia), Jean-Pierre Van Hees (Bélgica) y Zampognòrchestra (Italia).
L’actividá que va poner el pieslle a estes Xornaes de la Música Tradicional Asturiana ye’l conciertu de la Banda Gaites Llacín, que va presentar el discu Resollu‘l xueves 11 a les 20h, nel Teatru de La Llaboral y con entrada llibre. Toles actividaes van tar moderaes y/o presentaes por delles persones asociaes al Conceyu de la Gaita: Flavio Rodríguez Benito, Esteban González Corteguera, Tomás Esolá Muñiz, Pelayo Fernández Fernández, Susana de la Cruz Rodríguez, Rodrigo Fernández Joglar y Luis Álvarez Pola.
Polítiques de protección
Na rueda de prensa de güei, la Conseyera de Cultura, Política Llingüística y Deporte, Vanessa Gutiérrez, destacó qu’estes espresiones culturales constitúin «un pegoyu fundamental sobre’l que se sustenta la identidá asturiana«, polo que sorrayó la necesidá de calteneles, por exemplu, a traviés de los espedientes aniciaos pa declarar Bienes d’Interés Cultural (BIC) de calter inmaterial a la cultura asturiana de la gaita o a les dances tradicionales, ente otres.
Tamién destacó los presupuestos de la conseyería pa 2026, qu’inclúin la primer convocatoria d’ayudes a la difusión de la cultura tradicional, con un importe de 100.000 euros; y llinies nueves d’apoyu pa reforzar l’actividá d’escueles de música, tanto municipales como promovíes por asociaciones, por valor de 200.000 euros. Amás, la conseyera tamién anunció los Premios de Cultura Tradicional, que busquen reconocer a les persones y entidaes que destaquen pol so trabayu pa caltenela, y la celebración n’Uviéu del Festival Internacional de Mázcara Ibérica, que lleva faciéndose dende hai quince años en Portugal y que per primer vez va facese n’Asturies.
- El primer día va centrase na hestoria y evolución de les escueles de música popular, los modelos europeos y los retos actuales.
Unos 260 intérpretes, investigadores y docentes van participar a partir del llunes nes Xornaes de la música tradicional asturiana que se van celebrar en La Llaboral, en Xixón.
El primer día va centrase na hestoria y evolución de les escueles de música popular, los modelos europeos y los retos actuales. Pa ello, va cuntar cola participación de músicos como Carlos Núñez, Xuacu Amieva, José Ángel Hevia y d’espertos como Lisardo Lombardía.
- La segunda xornada va centrase na fabricación de gaites y nes principales llinies d’investigación en cursu.
