Esti sábadu 20 a les 10h son los Aguilandeiros de San Xuan de Villapañada, mazcarada d’iviernu recuperada pol ATOAM 
Llueu, dende les 15h, va haber xinta popular y folixa cola actuación de la Bandina Los Collainos . Musicasturiana.com
«Anxelinos somos, del cielu venimos, bulsina traemos, dineiru pedimos». Yá nun queda nada pa que los Aguilandeiros de San Xuan de Villapañada salgan a pidir l’aguilandu pelos llugares de Rozadas, Acebéu, La Llinar y San Xuan. Esti sábadu 20 esta parroquia moscona acueye esta mazcarada d’iviernu na que la música tradicional tien un papel cimeru.
La programación arranca nel albergue San Xuan de Villapañada a les diez de la mañana. Dende ellí van salir el diablu, la dama ya’l galán, el cura, la vieya, l’osu col amu y otros de los personaxes que formen los Aguilandeiros. Van percorrer los pueblos de la contorna en tractor faciendo’l papel de los sos personaxes, amás de cantando y tocando pieces tradicionales pa pidir l’aguilandu peles cases de los y les vecines.
Pa les 15h, nel Campu la Ilesia de San Xuan va haber xinta popular y folixa cola actuación de la Bandina Los Collaínos. Tamién va haber serviciu de carpa y chigre pa tola xente qu’aporte a esta cita imprescindible de la temporada asturiana de mazcaraes d’iviernu que se recuperó, dempués de setenta años ensin facese, gracies al trabayu fechu pol Archivu de la Tradición Oral d’Ambás (ATOAM).
