musicasturiana.comComo tolos díes de Nuechebona dende hai cuatro años, Algaire asoleyen un videoclip col que celebrar estes feches navidiegues 
Anguaño, quixeron «enguedeyase y tratar de facer coses diferentes»; asina ye como publiquen una obra que foi «un retu» de sacar alantre y na qu’andechen con elles la Banda Gaites El Gumial, el Coru Infantil del Conservatorio / Escuela Música Mieres y una montonera xente qu’acudió a la llamada d’esti grupu pa facer una danza colectiva en Mieres.
«La idea surdió yá enantes del branu, mentanto tábemos revisando material pal segundu discu. Dimos con un par de dances recoyíes nel conceyu Mieres que nos prestaron mucho pa facer dalgo con elles», desplica Juan Yagüe, guitarrista de la formación. Foi en metá del procesu de preproducción y grabación del cantar cuando se decataron de que «la melodía taba nun tonu ideal pa tocase con gaita en si bemol» y asina foi como aprovecharon esto pa facer realidá dalgo colo que llevababen «tiempu detrás d’ello y qu’hasta agora nun se llograra; que ye collaborar cola Banda Gaites El Gumial». Pero nun ye quedó ehí la cosa, porque Algaire tamién convidaron al Coru Infantil de la Escuela de Música de Mieres que, cola directora María Peñalver al frente, «fizo un mui buen trabayu», como desplica Yagüe agradeciendo a estes dos formaciones la so predisposición pa «facer realidá una esperiencia que yera nueva pa toos y toes» y que da forma a un tema con influencies folk-rock.
Lo colectivo marca la música y esto espárdese tamién al videoclip fechu por Báltico nel que participaron munches persones que respondieron al llamamientu qu’Algaire fizo a traviés de les sos redes sociales. «El núcleu d’esta idega y a la par el mayor retu lloxísticu y técnicu foi’l d’intentar axuntar a muncha xente pa grabar unos planos baillando la danza«, desplica’l guitarrista. «Yera xugáselo too un día a una carta y, por suerte, saliónos bien», añade valorando que’l tiempu «respetó» y agradeciendo la respuesta de «collacios, familiares, xente de grupos de baille, músicos y toles persones qu’acudieron al convite».
Lletra contra la guerra
Pero ye qu’amás, lo nuevo d’Algaire tamién caltién esi compromisu colo común na lletra: «La intención orixinal yera siguir la llinia del videoclip del pasáu añu, con temática navidiega, pero ensin cayer en tópicos o clixés, naguando por da-y una visión un poco actualizada. Sicasí, viéndonos mui influenciaos pola realidá social que se taba viviendo, les noticies qu’apaecíen continuamente en tolos medios… terminó saliendo una lletra que quier falar de la situación de les families en zones de guerra«. D’esta manera, Algaire crearon «un tema delicáu» que, como opina Juan Yagüe, «de villancicu tien poco, realmente». Sicasí, ye una amuesa de que les navidaes tamién son unes feches pa facer alcordanza de la xente que yá nun ta, pa reivindicar la xusticia social y pa que rescample la importancia de lo colectivo. Con esti tema, la formación mierense algama too ello.
