Lata de Zinc acueye’l festival de música moza n’asturianu’l 7 de febreru nel que toquen rellumeast, PVXARRA, entós y Lucía Rojo con Fruela 757.
Lata de Zinc acueye’l festival de música moza n’asturianu’l 7 de febreru nel que toquen Rellume, PVXARRA, Entós y Lucía Rojo con Fruela 757
La organización del IV Semando Fest, el festival que celebra y potencia la música moza n’asturianu, anuncia que yá tán disponibles les entraes a la venta pa la cuarta edición d’esti alcuentru cultural y musical. Les entraes pueden mercase dende güei al traviés de la plataforma Entradium. El festival va celebrase’l 7 de febreru de 2026 a partir de les 20:00 hores na sala Lata de Zinc d’Uviéu, un espaciu que que ye puntu de referencia pa la música alternativa y emerxente d’Asturies.
Nesta edición, como n’anteriores, va haber dos tipos d’entraes: d’una banda, la entrada moza, empobinada a xente mozo menor de 26 años, con un preciu de 10€. D’otra banda, la entrada xeneral, a un preciu de 15€.
El cartelu d’esta cuarta edición inclúi actuaciones de dellos proyectos musicales. Los grupos confirmaos son Rellume, un proyectu con raigaños na música tradicional; Entós, un tríu de folk de cámara con influencies variaes; PVXARRA, banda qu’entemez punk, hardcore y electrónica y la tonada lletrónica de Fruela 757 y Lucía Rojo apocayá anunciáu como parte del programa del festival.
Semando Fest ye un eventu que busca ser más qu’un conciertu y por eso tien una filosofía caracterizada por puxar pol relevu xeneracional na música asturiana; por ufrir un festival con un formatu orixinal qu’entemeza aspectos d’una gala colos d’una actuación; que reivindica les sales de conciertos como un espaciu afayadizu pal exposigue de la música de raigañu; y qu’apuesta por da-y oportunidaes a les y los creadores xóvenes.
La iniciativa nació en 2023 y nella participaron el dúu d’asturianada Alicia Villanueva y Luis Álvarez Pola; el tríu de folk de cámara Loína; les pandereteres Algaire y el dúu d’electrónica de raigañu Llevólu’l Sumiciu. Cecilia Díaz foi l’autora del cartelu y la identidá visual, mientres que les semeyes y el videu resume del eventu fueron obra de Lucía Garó. Yedra Riesgo y Raúl Alonso –responsables del programa radiofónicu Héroes Ensin Nome– fueron los encargaos de presentar l’eventu.
En 2024 xubieron al escenariu Sandra Álvarez y Noemí González col so espectáculu de poesía feminista y tonada -qu’anguaño preséntase como Milfueyes-; Mostru l’Horru col so rap combativu; la banda de folk celta Guieldu y el grupu de punk-rock Ochobre. Beatriz Menéndez –alter ego de Made in Chigre– foi la responsable de tola parte gráfica y Leticia Cernuda de les semeyes y del videu. Héroes Ensin Nome repitieron como presentadores.
Yá en 2025, foi’l turnu nel escenariu pa la percusión y les voces d’Abéu, la propuesta novedosa con una montonera de xéneros estremaos de Ferla Megía, el power folk d’Alienda nel so décimu aniversariu nos escenarios magar de la so mocedá y la banda de post-rock Melandru. L’artista Surimi, –nomatu de Paula Suárez– encargóse de la identidá visual, mientres que Nay Semeya fixo lo propio coles semeyes y la realización audiovisual. Héroes ensin nome repitieron na presentación.
