RTPA / El Principáu promociona los Alimentos del Paraísu Natural’ con una campaña nacional n’autobuses y estaciones de tresportes. La imaxe de los productos agroalimentarios asturianos va tar presente en tol país. L’oxetivu, reforzar el calter estratéxicu del sector primariu na economía asturiana.
La nueva campaña de promoción de la marca de calidá Alimentos del Paraísu Natural amosaráse n’ocho autobuses de la compañía Alsa que cubren la llinia Asturies-Madrid, asina como en pantalles instalaes en 15 estaciones de la capital, Granada, Valencia, A Coruña, Barcelona, Zaragoza, Alicante y Benidorm, amás de la d’Uviéu.
Seis vehículos amosarán la imaxe na so parte trasera y otros dos de forma entera pa dar visibilidá a estos productos en distintos puntos del país y reforzar el calter estratéxicu del sector primariu na economía asturiana, informa la Conseyería de Mediu Rural.
Amás, la promoción reforzóse cola presencia d’Alimentos del Paraísu Natural nel programa de la TPA ‘Conexión Asturias’ en tol mes d’avientu, y cola emisión d’anuncios na televisión pública asturiana nes fiestes.
A estes iniciatives amiéstense conteníos en medios dixitales y en papel, asina como reportaxes qu’averen los Alimentos del Paraísu Natural a tola ciudadanía.
@alimentosastur #asturiasparaísonatural #gastronomía #Asturias
