El teatru Filarmónica acoyerá’l prósimu vienres 13 la entrega de los XXI Premios AMAS de la música asturiana. “Nesta edición, 88 nomaos van competir en 22 categoríes que reflexen el talentu y la vitalidá del panorama musical asturianu”, aseguró’l presidente de la Fundación Municipal de Cultura, el conceyal David Álvarez. Web oficial /
Los Premios AMAS son los galardones oficiales a la música asturiana, que s’otorguen añalmente dende 2005 para reconocer el talentu y l’esfuerzu d’artistes y profesionales del sector nel Principáu d’Asturies.
Esti vienres 13 de marzu a les 19.30h el Teatru Filarmónica d’Uviéu acueye la gala d’entrega de los Premios AMAS 2026 y la organización d’estos gallardones ta acabante d’anunciar los dos nomes que van ser distinguíos col AMAS d’Honor: Mariluz Cristóbal Caunedo y Pauline en la Playa 
Los y les ganadores de les demás estayes van conocese esti mesmu vienres nel actu d’entrega de los premios. Musicasturiana.com
«Marilluz Cristóbal Caunedo ye una de les grandes voces de la tonada asturiana, con una trayectoria iniciada a finales de los años 70″, sorrayaron dende los Premios AMAS pa desplicar la decisión de concede-y la distinción d’Honor. Tamién reconocieron los «más de 25 años de trayectoria dientro de la música independiente» que Pauline en la Playa tienen al costazu.
El plazu de les demás votaciones populares tovía ta abiertu a traviés de la web oficial de los AMAS. Son dellos los nomes venceyaos a la musica n’asturianu los qu’apaecen nes nominaciones anunciaes de les 22 estayes que conformen estos premios. Asina ye como Leticia Baselgas panderetera y vocalista de L-R, ye la representación de la música n’asturianu na estaya de voz; mientres que Vero Rubio ye la persona nominada na categoría d’otros instrumentos pola so habilidá cola trompeta xunto con Gonzalo Llao, bouzukista en Deira.
Na estaya de la gaita, les bandes nominaes son la Banda Gaites Saxum, Banda Gaites Villa de Mieres, Banda de Gaitas «El Penedón» de Castropol y Banda Gaitas Conceyu Grau. Gonzalo Pumares, componente de Cerezal y Vérsica apaez nomináu tamién poles sos lletres. En producción, los cuatro nominaos apaecen na música n’asturianu: Luis Núñez tien dellos cantares n’asturianu y el premiu Camaretá al Meyor Cantar, Sergio Firu produxo pa infinidá de grupos asturianos, mesmo que Zeros, mientres qu’Álvaro Bárcena collaboró nel discu Camín de Fierro de la Banda Gaites Camín de Fierro.
Folk, rock y grupu revelación
Los nominaos al cantar folk nesta edición son Entós, con ‘Barro’; ‘El rescamplíu’ d’Alienda; ‘Cenicientes del Carbón’, de Marisa Valle Roso; y ‘L.lixeros’, single del futuru primer discu d’Abéu. D’otra banda, los artistes nominaos a discu folk son los d’Héctor Braga con Rabil; Banda Gaites Llacín, con Resollu; Rubén Bada, col so primer discu homónimu; y Guieldu, con Memories de Deva. Na estaya de discu rock, apaez Skama la Rede, col so álbum sacáu recién, nel que celebren los 20 años de trayectoria, mesmo que Lïbre, con dos cantares n’asturianu nel so primer EP.
A lo último, la banda moza La Ciudá nel Mar apaez nominada na estaya de grupu revelación. Son, en total, 23 nominaciones a artistes o persones venceyaes a la música n’asturianu y presencia en 9 de les 22 estayes, un datu que fala bien del rumbu y espoxigue que ta teniendo nesta dómina.
