Uviéu 2031: Porque la cultura nun se visita, vívese
https://www.facebook.com/oviedo2031/
La capital asturiana competirá con Cáceres, Granada y Las Palmas de Gran Canaria. Uviéu superó la primer criba pa convertise en 2031 en Capital Europea de la Cultura. La so candidatura foi seleccionada xunto a les de Cáceres, Granada y Las Palmas de Gran Canaria. Les cuatro aspirantes tendrán que pasar una segunda, y última selección, a finales d’esti añu.
Kike Garamendi
Uviéu nun precisa disfrazase de capital cultural, yá lo ye cuando’l Prerrománicu nos mira dende’l Naranco recordándonos quién somos. Postular a Uviéu pa 2031 ye, cenciellamente, abrir les puertes de la nuesa casa a toa Europa.
Un legáu que se toca.
Les nueses piedres nun son namás monumentos; son hestories. El Prerrománicu nun ye una lleición d’hestoria aburrida, ye l’arguyu de saber que, cuando Europa yera pura incertidume, equí yá se construyía guapura. Ser capital europea ye la oportunidá de que’l mundu entienda que la nuesa identidá ye l’orixen de munches otres.
Cada añu, cuando lleguen los Premios Princesa d’Asturies, la ciudá tresfórmase. Pero lo máxico nun ye solo l’alfombra azul, sino ver a los vecinos aldericando sobre ciencia, poesía o concordia nes places. Uviéu tien esa elegancia natural que nun se merca: la d’una ciudá que llee, qu’escucha ópera nel Campoamor y que curia les sos llibreríes como ayalgues.
Lo que fai especial a Uviéu ye la so escala humana. Ye una ciudá onde pues perdete pol cascu antiguu y acabar charrando con una escultura, o onde’l Campu San Francisco funciona como’l pulmón y l’alma de toos. Nun mundu que va escesivamente rápido, Uviéu ufierta un ritmu distintu: el de la conversación, el del paséu ensin prieses y el de la hospitalidá asturiana.
Nun escaezamos que somos el quilómetru cero. Por equí pasaron millones de pelegrinos buscando daqué más qu’un destín. Esa enerxía del Camín Primitivu trescala les nueses cais. Ser Capital Europea en 2031 ye abrazar esi espíritu d’acoyida y dici-y a Europa: «Equí empezó tou, y equí yes bienveníu».
