- Autor ALEJANDRO RODRIGUEZ SIMÓN @alejandrorsimon
- Testu LETICIA SANCHEZ RUIZ @letisaurus
La portada de güei ta dedicada a un animal que lleva sieglos formando parte de la nuesa cultura y qu’entá güei marca’l ritmu de la vida rural col so cantar de l’alba. El gallu domésticu vien de la India escontra’l 2000 a.C. Dende onde s’estendió a Persia y a Grecia
Dende l’Antigüedá atribuyóse-y un fuerte valor simbólicu.
El so cantar a l’amanecida ta acomuñáu a la nacencia del día, a los presaxos y a la vixilancia.
Los romanos rellacionabenlu con Mercuriu mensaxeru de los dioses y protector de los caminos.
El so simbolismu caltúvose vivu na cultura popular y medieval representando la lluz, la resurrección y l’alerta constante, atribuyéronse-y poderes curatibles y protectores, especialmente rellacionaos cola fertilidá, la salú y la bayura, la puxanza y la fuerza vital, por eso apaez en ritos matrimoniales y en diverses celebraciones del calendariu llabrador
Nel cristianismu’l gallu representa la vixilancia espiritual y la resurrección, motivu pol que mientres sieglos s’asitió a lo cimero de torres y catedrales, como una figura que vela y anuncia la lluz.
Tamién apaez n’antiguos sepulcros paleocristianos como signu d’esperanza y de vida tres la muerte.
Para los nórdicos avisa del peligru o del enemigu, ya inclusive ye un guía simbólicu escontra’l más allá.
El gallu nun ye solo un animal de corrolada: ye un antiguu símbolu de vida, vixilancia, fertilidá y renovación, que la so voz sigue siendo, cada mañana, la banda sonora de munchos de los nuesos pueblos
- Alejandro Rodríguez Simón ye un artista plásticu graduáu n’Arte con mención en Pintura na Universidá del País Vascu y Máster de Formación del Profesoráu en Dibuxu y Artes Plástiques na Universidá Internacional de La Rioxa. La so obra foi reconocida en numberosos certames nacionales y anguaño ta venceyáu a la Galería Acuña
- Leticia Sanchez Ruiz ye novelista y la banda lliteraria d’esti proyectu y como el gallu escribe les sos hestories a l’amanecida.
