Irene Faza Aladro, arqueóloga: «El silenciu heriédase, el mieu a falar, a recordar»./ L’arqueóloga piloñeta afonda na memoria histórica personal y colectiva en ‘La Tierra la Gallina». Ed. Trabe /Por Pablo A. Marín Estrada
L’ arqueóloga y antropóloga piloñesa Irene Faza Aladro publica l’ensayu ‘La Tierra la Gallina’ (Trabe), una afondamientu na memoria histórica de les muyeres nel franquismu dende la propia y la colectiva escritu col rigor del conocimientu y el valir de la emoción.
La Tierra la Gallina, que fala de memoria, individual y colectiva, pero que sobre manera fala d’escaezu y de cómo frayalu, ye una xoya (pequeñina) de la lliteratura asturiana, escrita por una moza nueva pero que sabe bien lo que quier contar y cómo quier contalo.
La Tierra la Gallina ye un prau d’Enu, n’Amieva. Pero tamién ye una ausencia. Ye la tierra que s’abandona pa poder siguir. Ye’l pan cambiáu pola firida. Ye’l silenciu que queda cuando la guerra lo lleva too. Nel nome d’esi prau ta escrita la historia d’una familia: la fame, el mieu, la represión de la posguerra. Antonio, enterráu nuna fosa común. Mersinda, trocando tierra por un sacu farina pa sostener la vida de los fíos. Y Olvido, neña entós, guardando ensin sabelo una memoria que nun yera solo suya, sinón d’un pueblu enteru. El nuestru. Irene Faza Aladro, escribe esta obra sobre esa memoria, recoyida en forma d’entrevistes que-y fizo a so güela Olvido. Hai dos planos nella: les palabres testuales d’Olvido o les parafrasiaes y les reflexones de la ñeta que surden d’elles. Irene Faza Aladro quier recuperar esa memoria antigua, de los probes, de los perdedores. Como la mesma autora diz: «Esta ye una historia de xusticia. Y la xusticia, anque te llibere, ye política. Y la política nunca tuvo del llau de los probes».
La Tierra la Gallina, que fala de memoria, individual y colectiva, pero que sobre manera fala d’escaezu y de cómo frayalu, ye una xoya (pequeñina) de la lliteratura asturiana, escrita por una moza nueva pero que sabe bien lo que quier contar y cómo quier contalo. Esta ye la historia d’Olvido Calleja Martínez, pero tamién la d’un país qu’aprendió a callar.
–Esta ye una obra venceyáu al so llabor como investigadora de la memoria colectiva, pero tamién mui personal ¿non?
–El llibru ta dividíu en dos partes:, una más lliteraria o narrativa onde se cuenta la historia de mio güela Olvido en primera persona y na que se xunen la so voz y la mía. La suya en trocinos de les entrevistes que yo tenía feches,y que quixe reflexar como ella me tresmitió la so memoria, coles sos pallabres, y van acompañaos d’esi relatu más lliterariu nel que yo construyo la so memoria familiar. Y después hai una segunda parte que ya ye más un ensayu, y na que,faigo un análisis de la historia de mio güela dende una perspectiva más antropolóxica. Si tuviera que definilo en poques pallabres diría qu’hai una mecigaya de coses porque se venceya lo emocional colo político y colo profesional.
–Una manera d’amosar que lo personal o familiar tamién ye político.
–Claro. Hai un momentu del llibru nel que digo que ‘La Tierra la Gallina’ ye una historia de política, porque lo que faigo ye politizar lo cotidiano. La parte más relacionada cola represión franquista, ya ye política de por ello, pero también politizo la vida cotidiana de mio guela, porque la d’ella también ta marcada pola cuestión de clase, de xéneru, de tener vivío nuna zona rural, etcétera.
–La Tierra la Gallina ye un prau que vusté convierte en símbolu.
–Ye un prau que ta n’Enu, nel conceyu d’Amieva y yera de mios bisgüelos, Antonio y Mersinda. Él yera anarquista, pertenecía a la CNT y matáronlu na guerra, termina nuna fosa común. Cuano Mersinda queda vilda piérdelo tou y hai un vecín que-y cambia’l prau por un sacu de farina. Ye un casu d’esa violencia que tuvo llugar nel franquismu y de cómo se-yos robaron les tierres y el patrimoniu a munches persones. El títulu engloba tou eso. Falo de la tierra, de la so perda, de la represión y la gallina ye un animal asociáu a la economía de la casa, que yera cosa de les muyeres.Entós doi un sentíu importante tamién a los cuidaos, intento devolve-yos la esencia política que la historia eliminó.
–¿Ye un ensayu contra l’escaezu y el silenciu impuestos?
–Falo de cómo se constrúi la memoria sobre les ausencies, nesti casu la del padre de mio güela, ún de tantos exemplos que podemos alcontrar a lo llargo d’Asturias y de tol estáu. D’esa violencia contra les families de los represaliados de impedi-yos remembrar a los muertos. Ese silenciu que al final, heriédase: el mieu a falar, a recordar. Esti llibru quier romper con ese silencio y dignificar a toes eses personas, tamién a toles muyeres que la historia acallantó y de les que la represión enterró el recuerdu.
–¿Qué la afaló a escribilo?
–Hai un primer momentu nel que me valió pa procesar el duelu pola muerte de mio güela. Después cuando m’animaron a publicalo vi necesaria la parte ensayística pa dexar claro qu’esos fechos que suceden nesa época, tienen consecuencies nel presente, nun ye dalgo remoto o islao, ye un procesu sociohistóricu que continua y llega hasta nós.
Irene Faza Aladro (L’Infiestu, Piloña) ye arqueóloga profesional y ta especializada n’estudios históricos y antropolóxicos de xéneru y memoria colectiva. Graduada n’Arqueoloxía pola Universidá Complutense de Madrid y con un máster n’Antropoloxía pa la Orientación Pública pola Universidá Autónoma de Madrid, cuenta con esperiencia n’investigación histórica y etnográfica, centrada nel estudiu de comunidaes rurales, tresmisión de saberes y memoria oral. Amás, desenvuelve trabayu de campu arqueolóxicu y fai parte del equipu d’investigación de los xacimientos arqueolóxicos d’El Castro d’Antrialgo (Piloña) y la villa romana de La Estaca (Les Regueres). Ye impulsora de les Xornaes de Memoria Histórica de Piloña, dientro de l’asociación Les Ablanes, y autora de la investigación Más allá de lo doméstico. El carácter político del trabajo cotidiano de las campesinas piloñesas de posguerra, publicáu pola Universidá Autónoma de Madrid y que dio pasu al proyectu audiovisual de recuperación de memoria histórica Falando sele.
