Cultura sofita dolce proyectos de medios de comunicación para impulsar l’usu del asturianu y el eonaviego. La convocatoria, dotada con barganal de 100.000 euros, beneficia a ocho empreses del sector. Les ayudes sofiten iniciatives en prensa escrita y dixital, pódcast y plataformes especializaes n’información de proximidá, cultura y música.
La Conseyería de Cultura, Política Llingüística y Deporte concedió 98.661 euros a dolce proyectos promovidos per medios de comunicación para fomentar la presencia y la normalización social del asturianu y el eonaviego. El resolvimientu de la convocatoria, publicada güei nel Boletín Oficial del Principáu (Bopa), beneficia a ocho empreses del sector y sofita iniciatives desenvueltes en prensa escrita, medios dixitales y nuevos formatos d’información y divulgación.
L’ayuda de mayor cuantía correspuende a Mecigaya Creativa, S. L., que va recibir 30.000 euros para’l desenvolvimientu de Musicasturiana.com. Ente los proyectos subvencionaos tamién figura la integración de conteníos en llingua asturiana nos diarios dixitales miGijón y miOviedo, de Persones Comunicación y Publicidá, S. L., con una aportación de 10.506 euros, y la canal d’actualidá n’asturianu Agora, de La Voz d’Asturies, impulsáu por Ediciones Periódiques del Noroeste, S. L., que va cuntar con 10.184 euros.
El Comerciu llogra 10.720 euros pa dos iniciatives: Alitar Asturies Web, dotada con 9.386 euros, y el pódcast N’Ayuri, que va recibir 1.333.
Pela so parte, Editorial Prensa Asturiana suma 12.655 euros pa trés proyectos: Artículos n’asturianu (1.215 euros), Escolinos (7.096) y Web n’asturianu (4.342 euros).
La convocatoria tamién financia dos iniciatives de Cuatro Gotes Producciones, S. L., con una cuantía global de 16.865 euros: Xixón al día, que recibe 8.528,87 euros, y Revista Viaxast, con 8.336,92 euros.
Amás, Ventura y El Faru va cuntar con 4.506 euros pa la publicación de páxines n’asturianu n’El faru de Carreño y Gozón, ente que Espublizastur va percibir 3.222 euros pal proyectu Infoasturies.com.
Estes ayudes, convocaes el pasáu xineru con una dotación inicial de 110.000 euros, tán dirixíes a empreses de prensa, radio, televisión y medios dixitales d’ámbitu autonómicu qu’incorporen conteníos n’asturianu o eonaviego a les sos propies canales de comunicación.
