Publicado en 7DÍES, Artículos, Samaín

Samaín, la Nueche d’Ánimes

Enantes de Halloween yá encendíemos calabaces y nabos: Samaín, la Nueche d’Ánimes. 7 díes

Muncho primero de que les películes yankis popularizaren Halloween, nos pueblos asturianos yá se vaciaben calabaces, encendíense lluces pa los difuntos y creíase que nesa nueche, los muertos podíen tornar al mundu de los vivos.

Cada 31 d’ochobre, les calabaces allumaes, les mázcares y les fiestes de terror anuncien la llegada de Halloween. Pa munchos ye una celebración foriata, importada d’Estaos Xuníos ya impulsada pol cine, la televisión y el comerciu. Sicasí, baxo esa apariencia moderna escuéndise una tradición muncho más antigua, venceyada a les creencies de los pueblos celtes de la Europa atlántica. Asturies, que comparte con esos territorios un importante heriedu cultural, caltién les sos propies costumes y vezos rellacionaos con esta fecha: la Nueche d’Ánimes o nueche de Difuntos.

Cuando los muertos tornaben a casa

Na tradición celta, Samhain señalaba’l fin del branu y l’empiezu de la metá escura del añu. Yera’l momentu nel que terminaben les colleches, acurtiábense los díes y la naturaleza entraba nel so periodu de reposu. Creíase que n’aquella nueche debilitábase la llende ente’l mundu de los vivos y el de los muertos, dexando que los espíritos tornaren temporalmente. Estes creencies atopen paralelismos nel folclor asturianu, au l’alcordanza de los difuntos, les apaiciones y la presencia de les almes ocuparon mientres sieglos un llugar destacáu.

N’Asturies, dalgunos d’aquellos vezos manifestábense de formes bien concretes. Les families dexaben comida y agua pa los difuntos y prendíen lluces que, según la tradición, ayudábenlos a atopar el camín de regresu a casa. Tamién se baleraben nabos y calabaces p’asitiar veles nel so interior, asitiándolos xuntu a les viviendes o nos cruces de caminos. Aquelles lluces podíen sirvir tanto pa recibir a los familiares finaos como pa caltener alloñaos a los espíritos malos. La costume de pidir alimentos de casa en casa, atribuyida tamién a los neños asturianos, constitúi otru de los paralelismos con celebraciones que güei asociamos puramente a Halloween.

Una tradición que sobrevivió al cristianismu

Cola espansión del cristianismu, les vieyes creencies populares foron conviviendo coles celebraciones relixoses. El 1 de payares (anda que nun había díes pa escoyer..) quedó dedicáu a Tolos Santos por orde del papa Gregoriu III, nel sieglu VIII, pero munches práctiques rellacionaes cola alcordanza de los muertos siguieron formando parte de la vida cotidiana. Les visites al campusantu incorporáronse a un calendariu que caltenía elementos de distintes dómines. La mitoloxía asturiana tamién caltuvo un ricu universu de seres rellacionaos cola muerte, como la Güestia, aquella comitiva d’ánimes que la so apaición anunciaba andancios, desgracies, malures o muertes.

De les aldegues atlántiques a les pantalles de Hollywood

La celebración que güei conocemos como Halloween desenvolvióse especialmente en Norteamérica, au la emigración irlandesa y escocesa llevó les sos propies costumes rellacionaes cola viéspora de Tolos Santos. Col pasu del tiempu, aquelles tradiciones tresformáronse nuna fiesta popular carauterizada por disfraces, les calabaces allumaes y les visites infantiles a les cases pa pidir duces. Mientres el sieglu XX, la industria cinematográfico, la televisión y darréu les grandes cadenes comerciales contribuyeron a estender esta versión per bona parte del mundu.

Asina llegó tamién a Asturies una celebración que munchos interpretaron como dafechu ayena, magar les sos semeyances coles costumes llocales. Lo que d’antiguo sirviera pa recordar a los muertos y protexer simbólicamente los llares convirtióse nuna fiesta de disfraces, decoración y consumu. Pero’l fenómenu tuvo tamién una consecuencia inesperada: espertó un interés nuevu poles mesmes tradiciones asturianes y por recuperar los nomes de Samaín y Nueche d’Ánimes.

Y ye que enantes que Halloween llegara equí con nome inglés y escaparates llenos de disfraces, les lluces de la Nueche d’Ánimes yá rellumaben nos caminos asturianos.

Autor:

Maestra de Llingua Asturiana Colexu Carmen Ruiz-Tilve - Uviéu