Banduxu caltién viva la so tradición de decorar con flores les tumbes per Tolos Santos./ Videu
Flor a flor, los vecinos de Banduxu decoren les 27 tumbes del cementeriu comunal del pueblu. Enantes, remuévese la tierra y moldéense les sepultures y enriba d’elles, espárdese una capa de posos de café y trácense motivos xeométricos. Les flores cultívenles tol añu nes cases del pueblu.
Naide sabe daveres cuándo y por qué entamó esta tradición ancestral pa festexar el Día de Tolos Santos. Tresmitióse de xeneración en xeneración y anguaño ye símbolu de recuerdu a los que yá nun tán y de xunión de tol pueblu.
El de Banduxu ye un cementeriu ensin llápides, de los pocos namás de tierra que queden n’Asturies. La Misa de Difuntos, coles tumbes yá decoraes, celebraráse mañana llunes.
