Publicado en Asturianu, Escritores

Jorge Fernández Díaz, escritor

El Comercio / Jorge Fernández Díaz, escritor: «Nel colexu de Bonos Aires sufrí bullying por entemecer el bable y l’español». «Los asturianos traxeron a Arxentina la épica del trabayu, la ética del progresu, la llucha… Son valores bien importantes»

Asturies viaxó con Jorge Fernández Díaz hasta Bonos Aires muncho primero de que l’escritor pudiera llegar a ella. Viaxó na voz de los sos padres, nel bable de la infancia, nes histories familiares y naquel Centru Asturianu de la capital arxentina onde creció ente dos orielles. Güei, ún de los escritores y periodistes más almiraos d’Arxentina, fíu de l.luarqués y balmontina, convierte esa memoria en lliteratura.

Nel V Congresu Mundial d’Asturianía, celebráu’l pasáu mes d’ochobre, atendió al Comercio nuna conversación d’alcordances, na que fala de los sos padres, de la emigración, de la identidá y de les firíes que tamién escriben una vida.

–Tres del enorme ésitu que supunxo ‘Ma’ llega ‘El secretu de Marcial’, dedicada a la figura del so padre. ¿Yera una asignatura pendiente pa poder completar la historia de la so familia?

–Claro, el mio padre cuando a los 15 años descubrió que yo quería ser escritor y a los 18 que quería ser periodista tamién creyó que lo que yo quería yera ser vagu. Resabió fondamente de la lliteratura y creyó, un poco acertadamente, que’l periodismu nel que yo entraba yera una bohemia. Poro, pa nun sufrir, diome por perdíu. Foi bien traumáticu pa mi pasar dellos años ensin poder parolar con él. Él nun podía, tenía una llende, polo xeneral, emocional, pa dicir ‘quiérote, fíu, ¿cómo tas?’, pero nesos años la cosa foi conxelándose muncho más. El mio padre diome por perdíu y yo intenté a partir d’eso que la profecía nun se cumplera.

–¿Qué significó emocionalmente volver a España col so historia sol brazu y ganar un premiu tan emblemáticu como’l Nadal?

–Foi bien fuerte ganar el Nadal con un llibru que trata del mio padre. Alcuérdome que yo fui convidáu como tolos finalistes y pensaba ‘¿qué pasa si lu gano, qué voi dicir?’ Y, bonu, cuando me nomen y xubí a recibir el premiu, puedo asegura-y que diba en blancu.

Nun sabía qué diba dicir, quedé dafechu en blancu, y cuando tomé’l micrófonu a cencielles dixi: ‘ye una gran ironía del destín qu’el mio padre, que descreía tantu de la lliteratura y que siempre quixo volver a España, torne a España vueltu una novela’. Toa una ironía del destín.

–¿Foi más difícil esquizar nel enigma de la vida del so padre que construyir el relatu sobre’l so madre años atrás?

–Fueron procesos distintos. Sobre’l mio madre tengo que dici-y que tuvi 50 hores en díes socesivos entrevistándola como periodista y como fíu. Rimos, lloramos, descubrí coses espantibles y coses maraviyoses qu’había nesa muyer. Pero claru, cuando fui escribir ‘El secretu de Marcial’ el mio padre yá taba muertu.

Entós empecé a buscar a los sos amigos; la mayoría taben muertos, pero había testigos, había episodios, había secretos familiares y collos pudi reconstruyir esta novela. Creo que ‘Ma’ ye más una crónica novelada y la de Marcial ye una novela pura y dura porque dexo cola ficción cuntar coses que cola verdá bultable nun podía.

Un realcuentru col padre
–Comentó que la presencia del so padre siguió bien viva nos sos suaños. ¿Sirvió esta nueva novela pa pacificar o entender meyor esa relación?

–Pos esta novela sigo que sirvió pa realcontrame col mio padre, reconciliame dafechu con él, anque lo fixéramos yá en vida, por supuestu. Hai una anécdota que siempre cuentu; cuando tábamos nesi procesu d’enfriamientu total, yo siguía nel periodismu, como periodista de sucesos y al empar escribía una novela por entregues, a la manera d’un folletín. Y el mio padre, que nun me falaba entós, de sópitu un día llámame por teléfonu a la redacción y pregúntame, ensin dicime hola nin nada, «¿va a a recuperar el bolsu, ¿va recuperalu?».

Yo nun me daba cuenta de qué taba falando, pero yera’l final del capítulu d’esi día. Había un bolsu llenu de dineru que-y robaben a daquién. Y di cuenta de qu’el mio padre me taba falando d’esa obra lliteraria. Él, al que-y paecía que la lliteratura yera la vagancia. Y saltáronseme les llárimes de los güeyos, y díxi-y sí «, pá, va recuperalu, ¿por qué me preguntes?». Dizme «¿tas seguru?», como si él nun tuviera seguru de que yo pudiera escribir eso. «¿Por qué me lu preguntes?» y díxome «porque equí tolos parroquianos del café, onde él yera camareru, pídenme que-yos diga, tán bien nerviosos y pídenme que-y diga qué va pasar a otru día». Yo díxi-y: «va recuperalu, pá», y él cortóme. Colgó y yo fui al bañu a llorar y aquel episodiu reconciliónos, porque la lliteratura que nos alloñara finalmente fíxonos amistarnos mutuamente.

–¿Qué-y diría’l so padre al ver qu’esa lliteratura de folgazanes recibía’l Premiu Nadal?

–Gustaríame muncho que tuviera vivu pa lleer la novela, pa vivir lo que vivimos nel Premiu Nadal, pa ver cómo’l so Rei Felipe VI, cuando m’apurrió’l Premiu Mariano de Cavia l’añu pasáu pelos mios artículos, tuvo que nomar a esos dos pobretones, Carmina y Manuel, que se fueren de dos aldegues asturianes na posguerra civil española, y qu’agora se convirtieron en personaxes de la lliteratura española.

Llectores y exemplares vivos
–Nes presentaciones del llibru, como la d’Uviéu, munchos llectores allegaron colos sos vieyos exemplares de ‘Ma’, foliaos pol tiempu. ¿Cómo vive l’impactu duraderu qu’esi llibru tuvo y sigue teniendo?

–Bonu, foi una historia increíble. Lo primero ye que ‘Ma’ tuvo llectores entusiastes bien importantes, como Joan Manuel Serrat, Víctor Manuel, Juan José Millás, Manuel Vilas o Arturo Pérez-Reverte. Y convirtiéronlu nun ésitu internacional totalmente inesperáu pa mi porque yera un llibru íntimu de primeres, un llibru que nun se diba a publicar. Foi una editora catalana quien me convenció de que teníamos de facelo.

–¿Qué supunxo presentar ‘El secretu de Marcial’ n’Uviéu?

–Foi bien emocionante. Taba toa’l mio familia asturiana. Yo soi la primer persona que nun nació n’Asturies de toa una familia xigantesca qu’a lo menos llega al medievu, asina qu’imaxínense lo que tengo d’asturianu nes venes.

–¿Qué representa Asturies dientro del so identidá, naciendo y crecíu n’Arxentina?

–Asturies ye, poques gracies, un territoriu propiu. Los mios padres enseñábenme bable cuando yo yera neñu, falábenme d’Asturies, vivíamos nel Centru Asturianu de Bonos Aires, con un horru, con gaites, escuchábamos les histories asturianes.

Visité munches vegaes Asturies, considérome en parte asturianu y en parte arxentín. De manera que, que sí. A mi interesóme muncho, sobremanera los mios padres proyectaos nesos llugares, a onde siempre quixeron volver y nun pudieron. Foi una firida qu’ellos nunca pudieron superar.

Autor:

Maestra de Llingua Asturiana Colexu Carmen Ruiz-Tilve - Uviéu