Publicado en Día de...

Día Internacional del Xuegu

La Oficina de N. Llingüística de Xixón  espubliza esti artículu d´interés nel Facebook. Apúrrovoslu para que podáis lleer y xugar.

Güei, 28 de mayu, cellébrase’l Día Internacional del Xuegu, col envís de reconocer la importancia de l’actividá física, entretenida y al tiempu educativa, que quedó un poco de llau na nuestra sociedá por cuenta de la era teunolóxica.

Esti día vien cellebrándose dende 1998, pa recordar que’l xuegu ye dalgo básico na neñez de les persones y que la xente adulto tien la responsabilidá de garantizar les condiciones necesaries pal xuegu. L’Asociación Internacional de Ludoteques foi quien propunxo esta celebración.

XUGAR ye una actividá universal, xugóse, xuégase y va siguir xugándose, a toles edaes y en cualesquier cultura del mundu. Xugar apúrrenos espontaneidá, ayudanos a deprender faciendo, estimula les nuestres emociones, permitenos interrelacionanos y munchos beneficios más qu’hai que tener siempre presentes. Xugar tamién ye una actitú esistencial, una manera de bregar cola vida y d’usar el maxín. Nos xuegos axúntense pensamientu, llinguax y fantasía. Y xugar ye, amás, un DERECHU . Sí, sí, un derechu. L’artículu 31 de la Convención sobre los Derechos del Neñu y la Neña diz qu’esiste “el derechu del neñu y la neña al descansu y al espardimientu, al xuegu y a les actividaes recreatives propies de los sos años, amás d’a participar llibremente na vida cultural y nes artes”.

Poro, güei más que nunca, vamos xugar, vamos pasalo bien, vamos deprender y vamos echar a andar el maxín. Dende la Oficina de Normalización Llingüística de Xixón proponémosvos delles idees pa cellebrar esti Día del Xuegu:

1) Un KAHOOT pa “Que nun te pesquen :una versión dixital d’esti xuegu de mesa de la Oficina  de Normalización, pa que calquéis nella cuando y onde más vos preste, pa demostrar los vuestros conocimientos sobre cosines venceyaes cola mar y con Asturies.

2) Una GUÍA DE RECURSOS  con una recopilación de xuegos y recursos didáuticos n’asturianu, que podéis consultar equí.


Calca y ve a “descargues” a atopala

3) Un RETU: animámosvos a subir semeyes  de la vuestra infancia col xuegu o’l xuguete que más vos prestara daquella, y a que nos contéis un pocoñín por qué yera tan especial pa vós (tamién valen fotos de la reciella d’anguaño o de la familia xugando xunta, claro).

P’abrir boca, dexámosvos con estes semeyes antigües de xente xugando qu’alcontramos na fototeca del Muséu del Pueblu d’Asturies, qu’agora pue consultase de baldre n´Internet

¡Que vos preste!

https://llingua.gijon.es/

Autor:

Maestra de Llingua Asturiana Colexu Carmen Ruiz-Tilve - Uviéu