Publicado en Música

Discu ‘Chants de Femmes des Asturies’

asturiescom

MUGA presenta’l so discu ‘Chants de Femmes des Asturies’. Tres llevar el so espectáculu de mesmu nome a escenarios d’Asturies, Catalunya o toda Francia, el grupu asturbretón Muga grabó col sellu discrográficu gascón Pagans.

“Hai qu’abrir les ventanes n’Asturies pa qu’entre aire nuevu y nun apoliye la música’l país”

 

“Ye rock radical, ye rock esperimental, ye trance, ye punk, ye blues… Tien una fuercia, una radicalidá, una brutalidá, un arcaismu tan fuerte que ye una pena reducilo a la etiqueta de folk o de músiques tradicionales”, apunta Clara Diez. La voz de Muga fala nesti videu xunto con Thomas Felder de ‘Chants de femmes des Asturies’.

“El discu ye un reflexu de lo que facemos en direuto”, añade Diez, la parte asturiana d’esti tríu con sede n’An Oriant, que por cierto, nun tien rellación cola banda homónima asturiana de música infantil autora de temes como Préstame pola vida.

Tres llevar el so espectáculu de mesmu nome a escenarios d’Asturies, Catalunya o toda Francia, Muga grabó col sellu discrográficu gascón Pagans, que trabaya con grupos qu’usen la música popular del so territoriu como material brutu pa esplorar les músiques actuales.

“Trabayamos con un repertoriu que tien una bayura de matices increíble”, espliquen nesti videu p’Asturies.com, nel que se pueden sentir cortes de dellos temes de ‘Chants de femmes des Asturies’, yá a la venta, los dos componentes de la formación que completa’l guitarrista Martin Chapron. “Esti discu nun ye un amiestu de música bretona y asturiana, ye una música más bien de periferia d’estilos de la música popular, de la música actual y de la música improvisao”, rellata’l violinista Felder, que cuenta la so esperiencia de visitar y conocer Uviéu y Amieva.

«Hai qu’abrir les ventanes n’Asturies pa qu’entre aire nuevu y nun apoliye la música’l país, y nun apoliyemos nosotros con ella”, fina Diez, qu’amás de cantar toca la pandereta y el panderu.

 

Autor:

Maestra de Llingua Asturiana Colexu Carmen Ruiz-Tilve - Uviéu