«El mio obxetivu yera facer unos cuentos que fueren participativos pa involucrar nellos tanto a los rapacinos como al contador». Nacíos va unos años, mientres la estancia del so autor n’Arabia Saudí como docente de la Universidá Rei Abdullah de Ciencia y Tecnoloxía, los relatos qu’igüen ‘Contar colos deos’ y otros qu’a la fin quedaron fuera, tuvieron como primer receptor al so fíu Mael, pal que los foi imaxinando col fin d’entretenelu enantes de durmise. Les manes del pá yeren les ferramientes coles que s’aidaba pa construir situaciones y personaxes «faciendo traces colos deos» y por eso, los testos que presentó al premiu, van precedíos d’unos dibuxos nos que se representen les estremaes figures dixitales pa lleelos en voz alto y que fexo Nora, la so otra neña.

L’escritor avilesín señala que’l so enfotu a la d’escribir estos doce cuentinos breves ye’l de que, cuando se editen, pueda producise dalgo asemeyao a esa esperiencia qu’a lo llargo de munches nueches compartieron el so fíu Mael y él mesmu. Los rapacinos a los que van empobinaos, asítialos nuna franxa d’edá como la que tenía el suyu naquel entós: ente los cinco o seis y los once años. «Él tien agora doce cumplíos y de xuro que-y va prestar en dalgún momentu saber que tuvo bastante que ver nesta historia, anque los cuentos ya nun-y lleguen», apunta’l so autor.

Nesti piñu de doce cuentinos vais descubrir que los deos de les manes, esos amigos nuestros tan amañosos pa tantes coses, valen igual pa echar cuentes que pa contar cuentos.

Discurriólos el so autor pa lleer n’alto y pa disfrutalos como un xuegu ente los mayores y la reciella (ma, pá, güelu, güela, tía, tíu, hermanu, hermana, rapacín o rapacina…). Nun sé vós, pero yo nun hubo cuentu que nun me contaren nin contara delles veces. Polo menos, tantes como deos hai nes manes.

Contái, contái.

 

Doctor en Bioloxía pola Universidá d’Uviéu ya investigador del Centru Oceanográficu de Xixón, Xosé Anxelu Gutiérrez Morán siéntese enantes que nada poeta. L’autor d’obres como ‘Países’ (Trabe, 2009), ‘Diversa memoria’ (Trabe, 2012) y ‘Un ciertu desorde’ (Suburbia, 2012), revela que «la poesía ye’l xéneru nel que me siento más cómodu, permítime dir a un ritmu lentu de trabayu que ye’l míu al escribir, dir faciendo un poema con tol tiempu del mundu y después poneme a xuntalos». Nesi sen, inda nun lo descarte dafechu, nun dulda n’afirmar que «una novela güei per güei escede les mios capacidaes de trabayu».

«El mio ritmu d’escritura ye dir pocoñín a poco»