El poemariu infantil «Versos d’Asturies», escritu por Daniel García Granda y ilustráu por Ilemi Cuesta Mier, torna a les llibreríes con una tercer edición en llingua asturiana. Un regresu afayadizu que confirma la bona acoyida d’esta obra ente los llectores, asina como l’interés creciente pola lliteratura infantil n’asturianu.
La llegada d’esta tercer edición nun ye namás un “trunfu” personal pa Daniel y Ilemi, sinón tamién un llogru importante pa la editorial Pintar-Pintar y pa toles persones qu’apuesten pola creación lliteraria n’asturianu. «Ver qu’un llibru infantil n’asturianu llega a una tercer edición ye un motivu d’allegría y d’esperanza», afirma l’autor.
Daniel García Granda, que s’estrenó na lliteratura infantil con esti títulu, reflexa nel so trabayu la conexón natural ente la poética y la musicalidá del asturianu. «La poesía, como la música, ye un xuegu de ritmos y cadencies, y na infancia depréndese d’una manera natural», señala l’autor, que recuerda como los primeros poemes nacieron como un entretenimientu compartíu cola so fía. Dende entós, «Versos d’Asturies» nun dexó de medrar, convirtiéndose nun referente na lliteratura infantil n’asturianu.
