Cultura impulsa la celebración de San Xurde para conmemorar el Día del Llibru n’AsturiesLa iniciativa propón festexar el 23 d’abril regalando llibros y una rosca, duce o salada, creada para la ocasión. El Principáu promueve esta cita en collaboración con editores, llibreríes, comercios, confiteríes, panaderíes, biblioteques y Miel d’Asturies IGP.
- Fonte: Actualidá Asturies
La Conseyería de Cultura, Política Llingüística y Deporte presentó güei San Xurde, una cita cultural y gastronómica para festexar n’Asturies el Día del Llibru’l próximu 23 d’abril. Trátase d’una iniciativa conxunta del Principáu colos gremios d’editores, llibreríes, comercios, confiteríes, panaderíes, biblioteques y Miel d’Asturies IGP.
Esta nueva propuesta, impulsada por Cultura, busca convertise n’una tradición asturiana amestada al Día Internacional del Llibru. La idea ye regalar llibros y rosques creaes para la ocasión poles confiteríes y panaderíes asturianes. D’esta miente, búscase realzar la figura de San Xurde, patrón de dellos conceyos asturianos y protagonista de lleendes locales como la del cuélebre de Zalón (Ayande), para convertilo nun iconu de la fiesta asturiana del llibru.
La iniciativa, frutu de la collaboración ente’l sector editorial, panaderu, confiteru, apícola y comercial asturianu, plantega celebrar esta xornada con un xestu doble: regalar un llibru y una rosca de San Xurde, ellaborá artesanalmente en dos versiones —salada y dulce— por panaderíes y confiteríes. Les rosques van tar disponibles en tamañu individual y con ingredientes calidable como’l miel d’Asturies IGP.
La nueva festividá busca fomentar la llectura, dinamizar el comerciu local y promover la producción cultural asturiana al traviés d’una celebración singular y guañao n’elementos propios de la identidá asturiana. Amás, pretende crease un venceyu ente’l llibru y la tradición, facilitando asina la participación ciudadana en redol a una fecha simbólica.
