La colonia más peculiar (y rosada) de la ría de Villaviciosa consolídase y llapada l’atención: catorce flamencos viven tranquilos nel estuariu alimentándose de pequeños crustáceos. La tranquilidá del enclave y la bayura d’invertebraos nos fangos intermareales favorez la presencia estable de los exemplares un añu dempués de la llegada d’una bandada de mediu centenar. LNE
La presencia de flamencos (Phoenicopterus ruber) na ría de Villaviciosa yá nun ye una imaxe escepcional. Daqué más d’un añu dempués de la llegada d’una bandada de mediu centenar d’estes aves al estuariu maliayés, un grupu asitióse nesti espaciu natural y aumentó apocayá hasta algamar los 14 exemplares.
Tres de dellos meses nos que nueve flamencos permanecieron de forma habitual na ría, la colonia creció, lo que confirma qu’esta güelga maliayés dexó de ser namás un llugar de camín pa convertise tamién nuna zona onde estes aves atopen condiciones favorables pa permanecer mientres llargos periodos.
La primer llegada rexistrada a finales del branu pasáu foi considerada polos espertos como un fechu pocu habitual n’Asturies. Lo que primeramente paecía una parada temporal dientro de los desplazamientos migratorios de los flamencos acabó nun asentamientu estable que sigue espertando l’interés de naturalistes y aficionaos a la observación d’aves, ente ellos el químicu y fotógrafu de naturaleza Juan Pérez Zaldivar, estudiosu de la avifauna na ría maliayesa.
Pérez Zaldivar atribúi esta presencia y permanencia siguida na Reserva Natural Parcial de la Ría de Villaviciosa a la combinación de dellos factores. Ente ellos destaca «la riqueza natural del estuariu y la bayura de pequeños invertebraos y crustáceos nos fangos intermareales qu’apurre una fonte constante d’alimentu, o les condiciones de tranquilidá qu’ufierta esti espaciu protexíu». Amás, señala que «tamién puen influyir los efectos del cambéu climáticu y l’aumentu de les temperatures nel norte, factores que tán modificando’l comportamientu y les rutes habituales de delles especies».
La medría de la colonia de nueve a catorce exemplares refuerza, amás, el valor ambiental de la ría de Villaviciosa y pón de manifiestu la importancia d’esti espaciu protexíu, convertíu nos últimos años nun llugar cada vez más relevante pa diferentes especies d’aves.


