EnllazFESTAVIENTUMIERES / Lliteratura, poesía y cultura asturiana en directo dende l’Auditoriu Teodoro Cuesta
Alcuentru y presentación del llibru: Xosefa de Xovellanos. La Esbelta. La dama ilustrada de les Lletres Asturianes
ALCUENTRO CON AUTORES Y ACERCAMIENTU A XOSEFA XOVELLANOS Y LA SO OBRA
- Vicente García Oliva (autor de los textos)
- Ilemi Cuesta Mier (autora de les illustraciones)
- Laura Iglesia (actriz de la compañía Higiénico Papel)
- Ester Sánchez ya Isidro Mª Pérez (de la editorial Pintar Pintar)
Jueves 10 de diciembre, 18 h En directo desde el Auditorio Teodoro Cuesta Retransmisión por el canal de Youtube del Ayuntamiento de Mieres
Ñacida en Xixón va cuasi tres sieglos, Xosefa de Xovellanos entovía permanez a la solom- bra del so hermanu Gaspar Melchor. Esti llibru ye un reconocimientu al llabor d’esta muyer nuna época na que’l so xéneru yerá apartáu, de miente sistemática, de la vida académica o cultural; una breve biografía, fecha con pro- curu y enllena de sentíu del humor, que tamién fai pensar nos estereotipos qu’entá queden por valtar. Una oportunidá, en suma, pa que la re- ciella s’acerque a Xosefa y la so obra.
L’álbum infantil Xosefa de Xovellanos, escritu por Vicente García Oliva ya ilustráu por Ilemi Cuesta Mier, céntrase na figura de la dama ilustrada de les Lletres Asturianes, una muyer que s’enfrentó a los estereotipos del sieglu XVIII n’España y que influyó nel entornu al traviés de la so poesía y el so llabor social.
El llibru, editáu por Pintar-Pintar, percorre la vida de Xosefa de Xovellanos dende que yera una rapaza hasta los sos caberos años dientro d’un conventu, pasando per una llarga estancia en Madrid, col maríu y les fíes, el retornu a Asturies tres quedar viuda y la renuncia —forzosa— al que fuera’l so últimu amor.
Nesti trechu, tamién apaez la figura del so hermanu Gaspar Melchor, que pol fechu ñacer varón tuvo les coses bastante más cencielles. «Nel sieglu XVIII taba claro que ser muyer –como hasta va pocu tiempu– yera una condena a ser segundona, al marxe de la mayor o menor capacidá del paisano. Si, pa encima, el paisano yera un home de la categoría de don Gaspar Melchor muncho más», apunta Vicente García Oliva.
«Nun momentu históricu», añade l’autor del testu, «nel que tán reivindicándose les figures femenines, tantu tiempu escaecíes detrás de los paisanos, ye importante que n’Asturies tamién lo faigamos coles nuestres. Xosefa Xovellanos ye una d’elles y había que la poner al algame del gran públicu».
Nesti sentíu, la ilustradora del llibru, Ilemi Cuesta Mier, amesta que «Xosefa nun tuvo les mesmes oportunidaes que’l so hermanu [Gaspar Melchor de Xovellanos] pol fechu de ser muyer». «Foi apartada a un segundu planu como lo fueran miles de muyeres a lo llargo de la Hestoria. Como muyer, pienso que ye una inxusticia, qué te voi dicir que nun sepas, qu’avanzamos muncho nel caminu y qu’entá mos queda muncho por percorrer. Tamién soi consciente que Xosefa, pola so posición, tuvo munches más oportunidaes que cualquier otra muyer de la época, polo que podría dicir qu’en realidá foi una muyer mui privilexiada», esplica.
Poro, el llibru fai pensar non sólo nos estereotipos del XVIII n’España, dende un puntu de vista «presentista», sinón naquéllos qu’entovía queden por valtar. «Paezme que de la llectura del llibru los escolinos van dase cuenta del valir de Xosefa: una muyer culta, intelixente y con sentíu del humor», añade l’autor.
