Sigue l’alerta meteorolóxico n’Asturies. A partir de les 12 d’esti miércoles y hasta les 20 hores va tar activáu l’avisu mariellu en tol Principáu por bastios localmente fuertes que podríen rexistrar hasta 25 llitros per metro cuadráu n’una hora. Amás, van venir acompañaos de nubes, de xarazo y de raches fuertes de vientu.
Esta situación débese a una masa d’aire frío aisllada en capes altes de la troposfera que’l martes taba alcontrada al oeste de les mariñes portugueses, y que’l miércoles va entamar un viaxe en dirección noreste hasta Francia, pero que va pasar pol noroeste peninsular a lo llargo del día.
Amás, les temperatures van baxar de forma xeneralizada. Nel casu de les máximes, van baxar hasta 6 ºC na metá sur, hasta 4 o 5 ºC nel restu salvu na mariña onde’l descensu va ser daqué más moderáu. Les mínimes van baxar sobremanera nel cordal, y de forma más llixera nel restu.
A partir del xueves el tiempu va dise claramente estabilizando. La masa d’aire frío yá va tar bien alloñada y van dir entrando altes presiones polo que se preven cielos pocu nublos anque, eso sí, con cierta *nubosidad d’evolución pela tarde. En llínees xenerales, prevese una recta final de selmana veraniega con grandes ratos de sol y con temperatures a l’alza.
