Esti domingu s’algamaron los 38 ºC n’Asturies, concretamente en Tinéu. La gran mayoría de poblaciones del interior superaron con facilidá los 30 ºC, ente que na mariña superaben los 25 ºC. Para’l llunes vamos encarar otru día d’enforma calor na rexón cuidao que l’Axencia Estatal de Meteoroloxía volverá activar a partir de les 13 hores l’avisu mariellu por altes temperatures hasta les 21 hores nel suroccidente, cordal y zona central d’Asturies. En cuanto al estáu de los cielos, vamos amanecer con nubes baxes na metá norte y cielos más soleyeros escontra’l sur.
A lo llargo de la mañana, dirán abriéndose grandes escamplaes salvu na mariña onde, a priori, va costar más trabayu que s’estenen los cielos pudiendo persistir la bruma. Pela tarde van apaecer nubes d’evolución que van dexar bastios tormentosos nel interior. Tamién por esta razón va tar activáu l’avisu mariellu a partir del mediudía. Los vientos van ser fluexos polo xeneral salvu en momentos de nube nes zones afectaes.
El martes van empezar a baxar les temperatures pero va ser el miércoles cuando baxen de forma estraordinaria y a dures penes consíganse algamar los 20 ºC.
