Esperamos intervalos de nubes medies y altes pela mañana con una probabilidá de precipitaciones bien baxa o prácticamente inesistente. Mientres la segunda metá del día nun se refuguen precipitaciones nel cordal y tamién nel suroeste. A la fin de la tarde tamién s’esperen delles agües nel restu del occidente y, antes de concluyir el día, ye posible que puedan escapase bien sele n’otros puntos del Principáu. Los vientos van soplar de suroeste moderaos mientres casi tol día. Estos vientos van consiguir que xuban les temperatures tanto nel casu de les máximes como nel de les mínimes. Les diurnes van xubir hasta 2 o 3 ºC, inclusive hasta 4 ºC en puntos del centru ya interior oriental. Les mínimes van xubir de forma estraordinaria ente 8 y 10 ºC respectu al sábadu polo que vamos amanecer con un ambiente térmico bastante más prestosu.
El llunes entá vamos siguir con vientos de suroeste mientres les primeres hores de la mañana pero, antes del mediudía, los vientos van afitase de noroeste coincidiendo col pasu d’un frente fríu que va dexar precipitaciones xeneralizaes y abondoses. La cota de nieve va dir baxando a lo llargo del llunes dende los 1800/2000 metros col entamu de les precipitaciones hasta acabar sobre los 1300 metros a última hora.
