Cuatro actos de la edición d’esti añu acueyen presentaciones, homenaxes y meses redondes onde participen delles personalidaes de la música.
El POEX vuelve demostrar esti añu que la lliteratura y la música asturiana caminen munches vegaes de la mano. Dellos de los actos del programa, anque concebíos dende la poesía, tienen una clara conexón cola escena musical del país, tanto pola presencia de músicos como pola rellación histórica ente versos y cantar n’asturianu.
La poeta Sofía Castañón va presentar Esti amor asturfalante, obra ganadora del Premiu Xuan María Acebal de Poesía, nun actu que va incluyir una llectura como adelantu de la próxima publicación. Va ser en dos feches: el vienres 13 a les 18 hores nel Toma 3 y el martes 17 a les 12 hores na Biblioteca de Roces. La conversación del primer día que va acompañar la presentación corre al cargu de Xaime Martínez, una de les voces más singulares de la creación asturiana contemporánea. Amás de poeta, Castañón ye conocíu pola so faceta audiovisual pola so participación nel espectáculu musical Ser quien a cantar, un proyectu que reflexona dende una mirada feminista la ocupación del espaciu públicu.
Precisamente, Xaime Martínez va tar presente n’otru de los actos entamaos pol POEX. La llectura de Pábilun, del propiu Xaime Martínez, publicáu nuna edición billingüe con traducción al castellanu de Fruela Fernández va ser el motivu. L’actu, que se va celebrar el xueves 19 a les 18 hores nel Toma 3 inclúi una conversación con Nacho Vegas, una de les figures clave de la canción d’autor estatal. A lo llargo de la so trayectoria, Vegas foi incorporando l’asturianu a la so obra musical con cada vez más presencia, sumando una montonera de cantares nesti idioma y reforzando’l diálogu ente poesía contemporánea y canción.
El festival tamién acueye un homenaxe al escritor Xuan Bello, fináu en 2025, tituláu A la solombra d’una zrezal. Nel actu del sábadu 14, a les 12 hores nel salón d’actos del CCAI, va presentase una pieza audiovisual creada pol Atenéu Obreru de Xixón. Bello foi una figura fundamental pa la cultura asturiana contemporánea y la so obra mantuvo siempres una fuerte conexón cola música del país. Dende la recuperación del imaxinariu rural hasta la defensa del idioma, la so lliteratura influyó tamién nel mundu de la música.
A lo último, la mesa redonda pol 20.º aniversariu de la revista Formientu, una publicación fundamental pa entender la evolución de la creación moza n’asturianu nes últimes dos décades, va cuntar tamién con representación del mundu de la música asturiana. Nel alcuentru del domingu 15, a les 12 hores nel Patiu del CCAI, participen quien dirixó la revista a lo llargo d’estos años: Claudia Elena Menéndez, Inaciu Galán y Diego Solís, cola moderación de Marta Mori, y cola incorporación como director nuevu a Raúl Alonso, collaborador d’esti mediu y co-director del Semando Fest y el podcast Héroes ensin nome.
El Festival de Poesía de Xixón (POEX) vuelve apostar pola presencia de la lliteratura n’asturianu na so programación con un total de diez actos repartíos en distintos espacios de la ciudá. La edición d’esti añu, centrada nel papel de la traducción na poesía, combina presentaciones, llectures, proyecciones y meses redondes con autores que trabayen na creación poética n’asturianu.
La programación entama’l vienres 13 nel espaciu Toma 3 con una llectura de poemes de Sofía Castañón, que va presentar un adelantu del so próximu llibru Esti amor asturfalante, ganador del Premiu Xuan María Acebal de Poesía. L’actu inclúi una conversación cola poeta Xaime Martínez.
El patiu del Centru de Cultura Antiguu Institutu va acoyer la celebración del 20.º aniversariu de la revista Formientu. Nel alcuentru van participar dalgunes de les persones que dirixeron la publicación nestes dos décades: Claudia Elena Menéndez, Inaciu Galán y Diego G. Solís y la incorporación a la dirección de Raúl Alonso. La mesa redonda va tar moderada por Marta Mori.
La programación continúa el llunes 16 nel mesmu espaciu con una sesión del ciclu Lost in Translation, na que Daniel García Granda va presentar la edición bilingüe de El saber del país / Country Wisdom, del escritor John Berger. L’actu inclúi una llectura de poemes xunto a Lucy Humphreys y una conversación con Rafa Rodríguez Valdés, director de la colección Calume.
El martes 17 va haber doble cita. Pela mañana, la Biblioteca de Roces va acoyer una llectura de poemes de Sofía Castañón como adelantu de la próxima publicación d’Esti amor asturfalante, nun actu que va incluyir conversación con Javier Almuzara. Pela tarde, la Biblioteca d’El Natahoyo va acoyer la presentación de l’antoloxía ilustrada Vientos verdes. Genias de la poesía, cola participación de les autores Luisa Antolín, Cristina Grisolia, Isabel Navarro, Olvido Andújar, Eva Navarro y Berta Piñán, moderáu por Ester Sánchez.
El miércoles 18, l’espaciu Toma 3 va acoyer la llectura de poemes de Patricia Suárez alredor del so llibru Sorolla fue tu voz, nun actu que va incluyir una conversación con Alfredo Garay. Un día dempués, el xueves 19, nel mesmu llugar, Xaime Martínez presenta Pábilun, una edición bilingüe con traducción al castellanu de Fruela Fernández, nuna llectura de poemes y conversación col músicu Nacho Vegas.
El vienres 20 la programación va incluyir dos actividaes. Pela mañana, nel IES Universidad Laboral de Gijón, Diego G. Solís lleerá poemes de los sos llibros Volvemos en 6 minutos y Nosotros, la primavera, obra cola que ganó’l Premiu Asturias Xoven de Poesía 2025, dientro del Aula POEX. Pela tarde, na Escuela de Comerciu de Xixón, celébrase una mesa redonda dedicada a la traducción al asturianu, con participación de Laura Marcos, Daniel García Granda, Vanessa Gutiérrez y Antón García, moderada por Marta Mori.
La programación n’asturianu va completase el sábadu 21 cola proyección de los videopoemes escoyíos nel V Concursu de Videopoemes POEX y la entrega del premiu correspondiente na Escuela de Comerciu.
Amás d’estos actos, la edición d’esti añu del festival tien como momentu central pa la lliteratura n’asturianu l’homenaxe al escritor fináu recién Xuan Bello, una de les voces más influyentes de la lliteratura asturiana contemporánea. L’actu va celebrase’l sábadu 14 nel Salón d’actos del Centru de Cultura Antiguu Institutu,cola presentación y proyección d’A la solombra d’una zrezal, una pieza audiovisual creada pol Atenéu Obreru de Xixón pa recordar la figura y la obra del escritor. L’actu quier reivindicar el so legáu lliterariu y la importancia de la so contribución a la consolidación de la lliteratura n’asturianu nes últimes décades.
