Valdesoto celebra esti sábadu les Xornaes de Mazcaraes d’Iviernu con participación internacional
Talleres, música y un desfile protagonizáu por grupos de distintos territorios marquen la programación d’esta edición. El Fielato / LNE /Nesta edición participaron agrupaciones procedentes de distintos territorios, como Galicia, con colectivos d’Ourense, ente ellos Folión y Boteiros de Viana do Bolo y As Bonitas de Sande; grupos d’otres comunidaes como Álava; ente qu’Asturies tuvo representada polos Sidros y Comedies de Valdesoto, los Mazcaritos d’Uviéu, los Mazcaraos de Rozaes (Villaviciosa) y el IES El Sueve de Les Arriondes.
Valdesoto vuelve convertise esti sábadu, 28 de marzu, nun referente de la tradición y la cultura popular coles Xornaes de Mazcaraes d’Iviernu, qu’algamen la so décimosesta edición consolidaes como una de les cites más destacaes del calendariu festivu de Siero.
Alredor de 170 participantes van dar vida a una programación que combina actividaes pa tolos públicos y que tien como momentu más esperáu’l desfile de mazcaraes, previstu pa les 16.30 hores peles cais de la llocalidá. Nél van participar distintos grupos que van amosar la bayura y variedá de les tradiciones venceyaes a les mazcaraes d’iviernu.
La xornada va entamar pela mañana con propuestes especialmente dirixíes al públicu infantil, como talleres de creación de mazcaraes, que busquen averar esti patrimoniu cultural a les xeneraciones más nueves y fomentar la so conocencia dende la base.
Una de les principales novedaes d’esta edición ye la participación d’un grupu procedente de Rumanía, que se suma a la presencia de colectivos de distintos puntos del Estáu, como Galicia, Euskadi o Ávila. Esta dimensión internacional refuerza’l calter d’intercambiu cultural del eventu y pon en valor les conexones ente tradiciones europees qu’entá caltienen rituales y simbolismos asemeyaos.
Les mazcaraes d’iviernu formen parte d’un patrimoniu etnográficu de gran valor, venceyáu a celebraciones ancestrales que combinen elementos festivos, simbólicos y rituales. Nesi sen, les xornaes de Valdesoto conviértense nun espaciu d’alcuentru y visibilización d’estes manifestaciones, amás d’una oportunidá pa la so recuperación y tresmisión.
Amás del desfile, la programación complétase con música y animación, contribuyendo a crear un ambiente festivo nel conxuntu de la llocalidá y favoreciendo la participación vecinal. La organización destaca, un añu más, la implicación del texíu asociativu y de la vecindá, clave pal ésitu y la continuidá d’esti eventu.
Rumanía estrénase nes mazcaraes de Valdesoto.
La lluvia amenazaba pero a la fin el tiempu dexó esfrutar con normalidá d’esti desfile que nun dexó indiferente a naide asegura Pablo Canal, presidente de l’asociación El Cencerru.
Esquiles, pieles, mázcares y personaxes únicos enllenaron les cais de Valdesoto con más de 180 participantes.
Esti grupu llamó l’atención coles sos cabres, que son una de les sos señes más característiques señala Ionela María Scurtu-Cardos, miembru de Balada-Masti de Rumanía.
Otros repiten dempués d’años ensin venir, como As Bonitas de Sande, que vuelven una década dempués apunta Antón Cao.
La tradición ta mui viva con mocedá como Martín Baraja, qu’a los sos 13 años guei estrénase como sidru.
Con esta son yá 18 ediciones d’una tradición que sigue medrando en Valdesoto.
