España vuelve a liderar en 2026 el ranking mundial de banderes azules, el distintivu que premia les playes, la so calidá del agua, accesibilidá y seguridá, con 677 galardonaes -16 n’Asturies espardíes per nueve conceyos- lo que supón 35 más que l’añu anterior a nivel nacional y dos más nel Principáu, les de Porcía (El Franco) y Navia.
Con esti resultáu, el meyor dende l’entamu d’esta iniciativa mediuambiental en 1987, la Comunidá Valenciana caltién el so lideralgu por comunidaes autónomes con 151 banderes; síguen-y Andalucía, con 143; Galicia, con 118; y Cataluña, con 101. Tamién destaquen Canaries, con 52 distintivos; Baleares y Rexón de Murcia, con 33 caúna; Asturies, con 16; Cantabria, con 11; y Estremadura, con 8.
L’Asociación d’Educación Ambiental y del Consumidor (Adeac), promotora del programa n’España, asoleyó esti martes los datos de 2026, edición na que tamién se dieron 111 banderes a cais deportivos, nueve más qu’en 2025, y seis a embarcaciones turístiques.
A nivel mundial, esti galardón ta presente en 51 países, y España ye’l país con más distintivos pa playes. De fechu’l 15% de les playes con bandera azul del mundu tán en territoriu español.
