- Alborecemos col cielu poco nuboso en xeneral ya con unes temperatures que tan alrodiu de los 13ºC, rexistrándose nel puirtu Payares 6,7ºC.
- Güei vamos tener dalgún intervalu de nubes altes que malpenes van velar el sol que sedrán más abondoses nes hores centrales del día con unes temperatures n’ascensu más acusáu nel interior, tando condicionáu pol aire nordés nel llitoral onde pue soplar cafiantemente.
- Mañana vienres seguiremos con dalguna nube alta pero con predominiu del cielu poco nuboso, amás les temperatures yá van ser plenamente braniegues con másimes que puen averase a los 30ºC nel interior, mentantu na costa seguirá l’aire nordés conteniendo les temperatures másimes y baxando la sensación térmica.
- El sábadu vamos seguir cola mesma situación, sicasí les temperatures van subir más con másimes perriba de los 30ºC, averándose a los 35ºC en dellos puntos del interior, amás el nordés va perder fuelle na costa y nel cielu seguiremos con dalguna nube alta.
- El domingu tendremos un día mui asemeyáu pero cola posibilidá de que surdan nubes de desendolque pela tarde y mos dexen dalguna tormenta pero esto yá lu diremos viendo.
