El Día Mundial de la Infancia pon el focu na salú mental y los derechos dixitales.
Barbón recordó que la nueva Llei d’Infancia y Adolescencia, aprobada’l mes pasáu na Xunta Xeneral, amplía los mecanismos pa que neños, neñes y moces puedan participar de forma activa na vida pública. Por casu, establez que les persones mayores de 16 años van poder suscribir iniciatives lexislatives populares, impulsa la creación de conseyos de participación infantil en tolos conceyos y obliga a que los proyectos normativos del Principáu incorporen un informe d’impactu sobre la infancia y l’adolescencia. Actualidá
La norma asitia a neños y neñes nel centru de les polítiques públiques, como ciudadanos y ciudadanes de plenu derechu. Na so ellaboración, precisó’l xefe del Executivu, participaron más de 4.000 menores, que les sos aportaciones y suxerencies “contribuyeron a facer una Asturies meyor”.
Llaviana foi’l primer conceyu asturianu con grupu de participación infantil y conseyu municipal d’infancia y adolescencia. Nel 2006 foi declaráu Ciudá Amiga de la Infancia, una reconocencia qu’otorga Unicef y que foi anovando hasta agora. Nel períodu 2018-2020, llegó a llograr inclusive’l sellu d’excelencia. Na actualidá, 43 conceyos asturianos cunten con esta reconocencia y hai más de 1.500 neños, neñes y adolescentes tán implicaos nos grupos de participación.



