Ye’l día del traxe’l país asina qu’hai que vistir traxe’l país pa vivir la fiesta más guapa y elegante del añu. «Anda, galán, compónte y vamos pal baille / que si nun voi contigo nun voi con naide».
- Desde les once hasta les doce y media, pa les neñes y pa los neños, tenemos «Menudu traxín» con una montonera de xuegos tradicionales na plaza l’Ayuntamientu. Y la collaboración del Grupu Prau Llerón.
- A partir de la 1 arranca Indumentaria 2024, na plaza Los Dolores. Vamos poder ver nel concursu munchos y bonos exemplos de traxe’l país y un xuráu independiente va conceder tres distinciones nes categoríes d’home y de muyer.
- N’acabando’l desfile, toles persones concursantes y tolos demás que vistan el paxellu asturianu van tener el privilexu de garrase de les manes y armar una danza na plaza l’ayuntamientu.
- Y de tarde, a partir de les 5 empieza’l baille del país na plaza’l mercáu. Lo primero con una gran danza pa les persones que vistan traxe’l país y luego con toque pa lo suelto y pa lo agarrao, de pandereta, pandeiru, payel.la, gaita ya tambor con: Ramsés Ilesies y Xosé Antón Fernández «Ambás»; Muyeres por Grau; Raquel Álvarez y Pablo Álvarez; Roge Feito y Clarita Braña; La Flor de Grau; Santi Galguera y la collaboración del Grupu Etnográficu L’Oriente.
Munchísimes gracies al Ayuntamientu de Grau y a Caja Rural de Asturias.
